Паводле міліцэйскага пратаколу, Аляксей Прохараў зрабіў 3 сьнежня на сваіх старонках у сацыяльных сетках Facebook і «Вконтакте» публікацыі, якія ўтрымлівалі заклік да ўдзелу ў несанкцыянаваным масавым мерапрыемстве – «Жывым ланцугу за права быць незалежным» у Менску. Як мяркуюць міліцыянты, гэтым самым Прохараў парушыў заканадаўства аб масавых мерапрыемствах (ч.1 арт. 23.34).
Аляксей Прохараў паведаміў, што разгляд адміністрацыйнай справы адбудзецца 26 сьнежня ў судзе Віцебскага раёну. Пачатак судовага паседжаньня ў 11.00.
Хто менавіта будзе судзіць віцябляніна, пакуль невядома.
У размове зь «Віцебскай Вясной» Аляксей Прохараў прызнаўся, што ня ведаў нават пра існаваньне такога артыкулу ў Адміністрацыйным кодэксе.
«Упершыню з гэтым сутыкаюся. Ці лічу я сябе вінаватым?.. Ну, паводле літары закону, які зараз дзейнічае, так, нібыта я парушыў. Але, з другога боку, тут жа пытаньне незалежнасьці краіны! Дык за што тады судзіць?..» – сказаў Аляксей Прохараў.
Зьміцер Міраш