Паводле ягоных словаў, яму не пашчасціла апынуцца ў раёне чыгуначнага вакзала 28 лютага каля 18 гадзін: якраз на гэты час каля чыгуначных вакзалаў  розных гарадоў Беларусі былі анансаваныя антываенныя акцыі.

Сяргей Серабро добра вядомы віцебскім міліцыянтам, і яго з’яўленне на чыгуначным вакзале магло выклікаць пэўныя падазрэнні: ён з’яўляецца заснавальнікам незалежнага інтэрнэт- рэсурсу «Народныя Навіны Віцебску». Верагодна, супрацоўнікі міліцыі вырашылі, што спадар Серабро збіраецца рабіць рэпартаж з несанкцыянаванай акцыі.

Сайт «Народныя Навіны Віцебску» існуе ўжо 16 гадоў,  і яго неаднаразова спрабавалі заблакаваць. У жніўні 2020 года Мініформ заблакаваў адзін з  паддаменаў — news.vitebsk.сc, прычыны блакавання не паведамляліся. Цяпер рэсурс працягвае працаваць па іншым адрасе, але час ад часу карыстальнікі інтэрнэту маюць праблемы з доступам, бо спробы заблавакаць «Народныя Навіны Віцебску» працягваюцца.

Феліцыян Красоўскі