Выстаялі нямногія: абнаўляюцца два «Витебских курьера» - адзін з іх працягвае працаваць у даменнай зоне by, пішучы на нейтральныя тэмы, другі выжывае ў эміграцыі, не губляючы сувязяў з Віцебшчынай. Па-ранейшаму працягвае працаваць для сваіх сталых чытачоў сайт “Віцебская вясна”, дзе крытычныя публікуюцца матэрыялы на прававую і сацыяльную тэматыку. Працуе і наш Тэлеграм-канал "Віцебская вясна", на які можна падпісацца, калі вы ў бяспецы. Можна таксама чытаць навіны і без падпіскі, непасрэдна выходзячы на інтэрнэт-рэсурс https://t.me/vicspring.

Паўстаюць і новыя інтэрнэт-рэсурсы, звязаныя з нашым рэгіёнам. У аснўным гэта групы ў сацсетках, месэнджарах і відэаплатформах. Мы знарок іх не называем, каб не даваць “наводку” для ўключэння ў Рэспубліканскі спіс экстрэмісцкіх матэрыялаў.

Паводле аналізу, негатыўныя трансфармацыі адбыліся не толькі ў незалежным медыясектары. Інтэрнэт-рэсурсы дзяржСМІ таксама гібеюць, і гэта найперш звязана з "аптымізацыяй" у рэдакцыях некаторых раённых газет, якія далучылі да абласнога і гарадскога выданняў. Дзржаўная прэса перажывае крызіс - нягледзячы на гучныя заявы пра "адзіныя крыніцы праўдзівай інфармацыі", "раёнкі" чытаюць мала, іх выпуск у шэрагу выпадкаў стаў нерэнтабельным. І працаваць прапагандыстамі таксама няма ахвотных - ДзяржСМІ Віцебшчыны перажываюць відавочны кадравы голад.

Руслан Артураў