Некалькі дзён запар у розных гарадах краіны працягваецца пераслед грамадзян, якія ў апошнія дні выходзілі на мясцовыя акцыі пратэсту: у падтрымку экаактывістаў Берасця ("кармленне галубоў") і ў падтрымку блогера Сяргея Ціханоўскага. Не абышлося і без адміністрацыйных арыштаў. Суды адпраўляюць некаторых "на суткі" за ўдзел у мірных сходах па артыкуле 23.34 КаАП. Праваабаронцы "Вясны" заклікаюць беларускія ўлады адмовіцца на перыяд абвешчанай пандэміі ад прымянення адміністрацыйнага затрымання на тэрмін звыш 3-х гадзін і адміністрацыйнага арышту.
Паводле інфармацыі "Вясны" на вечар 8 траўня "суткамі" пакараныя мінімум пятнаццаць чалавек. Праваабаронцы заклікаюць падтрымаць лістамі і паштоўкамі салідарнасці тых, то ажыццяўляў свае канстытуцыйныя правы на свабоду выказвання меркавання і на свабоду мірных сходаў, гарантаваных міжнароднымі дакументамі.
КУДЫ І КАМУ ПІСАЦЬ?
Ізалятар часовага ўтрымання УУС Гомельскага аблвыканкама,вуліца Міжгародняя, 26, г. Гомель, 246012 |
Блогера Сяргея Ціханоўскага ("Краіна для жыцця") затрымалі 6 траўня. Пасля афіцыйнага каментара МУС стала зразумела, што яго адправілі адбываць 15-сутачнае пакаранне за ўдзел у снежаньскай акцыі супраць інтэграцыі з Расеяй. Павінен выйсці на волю 21 траўня.
7 траўня асуджаны на 15 дзён актывіст Аляксей Саламошэнка за ўдзел у акцыі "кармленне галубоў" каля нулявога кіламетра ў цэнтры Гомеля 3 траўня. Павінен выйсці на волю 22 траўня.
Ізалятар часовага ўтрымання УУС Магілёўскага аблвыканкама,вуліца Крупскай 99Б, г. Магілёў, 212011 |
Восьмага траўня суд Ленінскага раёна Магілёва адправіў на "суткі" пяць чалавек, якіх затрымалі яшчэ 5 траўня. Гэта каманда "Краіна для жыцця" з аўтадома і жыхары Магілёва, якія адбівалі кіроўцу аўтадома ад міліцыі:
- Блогер Уладзімір Няронскі ("Слуцк для жыцця") — 10 сутак. На волю павінен выйсці 15 траўня;
- Арцём Сакаў — 5 сутак. На волю павінен выйсці 10 траўня;
- Кіроўца аўтадома "Краіна для жыцця" Аляксандр Арановіч — 6 сутак. На волю павінен выйсці 11 траўня;
- Сцяпан Лазаронак — 5 сутак. На волю павінен выйсці 10 траўня;
- Вячаслаў Зайцаў — 2 сутак.
Ізалятар часовага ўтрымання Лідскага РАУС,вуліца Перамогі, 36, г. Ліда, 231281 |
Фельчар хуткай дапамогі з Ліды Павел Палейчык затрыманы 7 мая і асуджаны на 7 сутак на наступны дзень. Павінен выйсці на волю 14 траўня.
Яго абвінавацілі ва ўдзеле ў "несанкцыянаваным мерапрыемстве" — сустрэчы з блогерам Сяргеем Ціханоўскім. На той сустрэчы Палейчык распавёў пра цяжкасці, з якімі сутыкаюцца медыкі падчас эпідэміі каранавіруса. Праблемы ў Палейчыка пачаліся яшчэ да гэтай сустрэчы: кіраўніцтву не спадабалася, што ён звярнуўся да валанцёраў з просьбай забяспечыць медыкаў рэспіратарамі.
Таксама 7 сутак прысудзілі жыхару Ліды Андрэю Паляковічу за ўдзел у сустрэчы з блогерам Ціханоўскім. Павінен выйсці на волю 15 траўня.
Вядома таксама, што асудзілі 7-сутачным арыштам яшчэ аднаго фельчара Алега краўца. На волю павінен выйсці 15 траўня.
Ізалятар часовага ўтрымання Гродзенскага РАУС,вуліца Гая, 4, г. Гродна, 230010 |
Гарадзенскаму актывісту Аляксандр Лаўрэнцеву 8 траўня прысудзілі 7 сутак адміністрацыйнага арышту. Але на волю ён павінен выйсці толькі 17 траўня, бо засталіся яшчэ двое неадбытых сутак. Па ўсёй верагоднасці, яго асудзілі, як і іншых, за ўдзел у сустрэчы з блогерам Ціханоўскім, які прыязджаў у Гродна.
Таксама па артыкуле 23.34 КаАП у Гродне адправілі на суткі яшчэ чатыры чалавекі:
Яўген Рэзнічэнка — 6 сутак. На волю павінен выйсці 14 траўня;Алена Сахарчук — 6 сутак. На волю павінен выйсці 14 траўня;Васіль Калач — 7 сутак. На волю павінен выйсці 15 траўня;Юрый Шока — 7 сутак. На волю павінен выйсці 15 траўня.
Праваабаронцам вядома, што за кратамі да суда на выходныя застаюцца праваабаронца "Магілёўскай вясны" Аляксандр Буракоў, берасцейскі блогер Сяргей Пятрухін ("Народны рэпарцёр", "Youtube-дэпутаты"), журналіст-фрылансер з Глыбокага Дзмітрый Лупач, магілёўскі блогер і журналіст Міхаіл Аршынскі ды іншыя.
Больш падрабязна пра затрыманых можна пачытаць тут:
Пераслед прыхільнікаў блогера Ціханоўскага і іншых актывістаў працягваецца восьмага траўня
ШТО ПІСАЦЬ?
У гэтым матэрыяле расказваем, як пісаць лісты ў месцы зняволення, якія ёсць асаблівасці і лайфхакі:
"Хачу напісаць вязню!" Распавядаем, як гэта зрабіць
Мы падрыхтавалі інструкцыю, для тых, хто хоча напісаць арыштаваным, але не ведае з чаго пачаць.
Інфармацыя па затрыманым удакладняецца і дапаўняецца.
Калі вас ці вашых знаёмых затрымалі ці выклікаюць у міліцыю з нагоды ўдзелу ў акцыях пратэсту, просім звяртацца да праваабаронцаў: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду. (грамадская прыёмная), маб.: +37529 841 39 81 (грамадская прыёмная), па гэтым жа нумары Signal, WhatsApp, Telegram.
Крыніца: За акцыі на суткі адправілі мінімум пятнаццаць чалавек. Падтрымай іх паштоўкай салідарнасці