Алег Рудакоў нарадзіўся ў Полацку, але па сканчэнні школы паехаў вучыцца ў Цюменскую вышэйшую ваенна-інжынерную вучэльню. Па сканчэнні апынуўся ў Іркуцку, дзе стварыў і 17 гадоў узначальваў Іркуцкае таварыства беларускай культуры імя Яна Чэрскага "Крывічы". Гэта найбуйнейшае ў Сібіры нацыянальна-культурнае ўтварэнне (сярод чатырох дзясяткаў іншых) і адна з самых актыўных у Расіі беларускіх суполак. Пасля ад’езду Рудаковых культурніцкія традыцыі працягваюць іншыя ўдзельнікі суполкі. Беларускую мову самастойна вывучылі нават тыя, хто ніколі ў Беларусі не быў, але мае там свае карані.

Разам з жонкай Алег Рудакоў пераехаў на Полаччыну, дзе аднаўляў радавую сядзібу ў вёсцы Бяздзедавічы. Вольга Рудакова за некалькі год стала адной з самых вядомых майстрых Віцебшчыны – яна захавальніца традыцый беларускіх народных рамёстваў, праводзіць майстар-класы па вышыўцы і ткацтве, робіць паясы, вязаныя цацкі, шые традыцыйнае народнае адзенне. Сужэнцы рэгулярна ўдзельнічалі ў імпрэзах, якая мелі беларускі нацыянальны каларыт, у тым ліку ў «Горадзе майстроў» падчас фестывалю «Слявянскі базар у Віцебску».

Алег Рагавы