У Карабоўскай сярэдняй школе ў межах праекта «Азбука гражданина. Версия 5.0» школьнікаў вучылі галасаваць, а камусьці нават пашчасціла пабыць «кандыдатам» або «старшынём выбарчай камісіі». З дзецьмі «прайшлі» усе этапы выбарчай кампаніі – ад рэгістрацыі ініцыятыўных груп да падліку галасоў.

Раённая газета апублікавала інфармацыю пра трэнінг для чальцоў выбарчых камісій, якіх навучалі, як дзейнічаць «у пазаштатных сітуацыях». На сайце выдання не гаворыцца пра тое, чаго канкрэтна варта апасацца ўдзельнікам выбарчых камісій падчас датэрміновага галасавання або ў асноўны дзень прэзідэнцкіх выбараў. Але ў фотарэпартажы да артыкула яны знятыя так, што пазнаць гэтых людзей цяжка. А месцамі твары і ўвогуле «замыленыя»...

У Беларусі завяршыўся працэс вылучэння так званых кандыдатаў у дэлегаты УНС. А завяршальны этап фармавання так званага вышэйшага прадстаўнічага органа ўлады працягнецца да 10 красавіка. Усебеларускі народны сход пройдзе 24 - 25 красавіка. Яго дэлегатамі стануць 1200 чалавек з усёй краіны.

У Віцебску на пасяджэнні дэпутатаў мясцовых Саветаў базавага ўзроўню 4 красавіка былі на безальтэрнатыўнай аснове выбраны восем членаў Савета Рэспублікі восьмага склікання. Ім дадзена права працаваць і прадстаўляць у верхняй палаце Віцебскую вобласць. Пры выбары кандыдатаў улады не сталі гуляць у дэмакратыю – ніводны кіраўнік віцебскіх аддзяленняў чатырох зарэгістраваных партый не стаў сябрам СР.