У звароце ў МУС Павал Левінаў піша, што «сыстэма выкананьня пакараньняў РБ закрытая, але мае дастаткова наведнікаў», таму «лічыць, што каронавірус туды не прабярэцца, не даводзіцца». Між тым, асобы, якія ўтрымліваюцца зараз у месцах несвабоды, знаходзяцца ў групе рызыкі: маюць слабы імунітэт і ня маюць магчымасьці самаізалявацца і трымаць сацыяльную дыстанцыю.
Каб захаваць іх жыцьці і здароўе праваабронца патрабуе увесьці ў месцах пазбаўленьня волі павышаныя меры бясьпекі.
Што патрабуе Левінаў
- Кожнаму супрацоўніку і наведнікам гэтых месцаў штодня рабіць тэрмамэтрыю, дадзеныя рэгістраваць у адмысловым дзёньніку.
- Выдаваць усім супрацоўнікам і наведнікам месцаў няволі (абаронцам, сьледчым і г.д.) мэдычныя маскі (рэспіратары).
- Мець памяшканьні для ізаляцыі асобаў з сымптомамі захворваньня.
- У выпадку выяўленьня асобаў з сымптомамі каронавіруснай інфэкцыі неадкладна ізаляваць іх і выклікаць лекараў з цывільнай больніцы.
- Абмежаваць, па магчымасьці, кантакты асобаў, якія знаходзяцца ў месцах несвабоды, са зьнешнім сьветам.
- Прыпыніць перамяшчэньне зьняволеных з аднаго месца несвабоды ў іншыя, а таксама – перамяшчэньне ўнутры гэтых месцаў.
- Асобаў, якія прыбываюць у месцы няволі, зьмяшчаць у карантын на тэрмін паўтары месяцы.
- Прыпыніць выкананьне адміністрацыйных пакараньняў у выглядзе арышту.
- Узьняць пытаньне аб вызваленьні асобаў, якія не нясуць грамадзкай небясьпекі, а таксама непаўналетніх і асобаў, старэйшых за 60 гадоў, пераважна тых, хто знаходзіцца пад сьледзтвам.
Зьміцер Міраш