Сваё патрабаваньне Сяргей матываваў тым, што, на яго думку, публічная гастрольная дзейнасьць згаданага грамадзяніна падрывае нацыянальныя інтарэсы Рэспублікі Беларусь, пагражае грамадзянскаму міру ў нашай краіне і супярэчыць указу «Аб правядзеньні культурна-відовішчных мерапрыемстваў», згодна зь якім забараняецца правядзеньне імпрэзаў, якія маюць на мэце ажыцьцяўленьне прапаганды вайны ці экстрэмісцкай дзейнасьці.

У атрыманым адказе паведамляецца, што аблвыканкам не атрымліваў зваротаў ад Віктара Каліны наконт выдачы пасьведчаньня на права арганізацыі і правядзеньня культурна-відовішчнага мерапрыемства на тэрыторыі Віцебскай вобласьці. А рэклямная інфармацыя аб правядзеньні канцэртаў, што зьявілася, была незаконнай, і артысту растлумачаная недапушчальнасьць правядзеньня рэклямнай кампаніі да моманту атрыманьня адпаведнага пасьведчаньня. Пасьля афіцыйнага адказу рэкляма пра канцэрты, што мусілі адбыцца ў некалькіх гарадох Віцебшчыны ў лютым, была выдаленая з інтэрнэту.

А неўзабаве «прыхільнік Славянскага сьвету», як Каліна сам пра сябе заяўляе – хутчэй за ўсё, праз страх страціць магчымасьць зарабляць у Беларусі – зьмясьціў на сваім сайце адкрыты зварот да сродкаў масавай інфармацыі Беларусі, супрацоўнікаў культуры і ідэалёгіі, а таксама да прыхільнікаў і гледачоў. У звароце выканаўца шансону выказаў вялікую павагу прэзыдэнту Лукашэнку, захапіўся ўзроўнем разьвіцьця ў краіне дэмакратыі і магчымасьцю самавыражэньня, а таксама не забыўся прайсьціся па беларускай апазыцыі. Мабыць, такім чынам ён паспрабаваў быў спадабацца беларускім чыноўнікам, каб атрымаць гастрольнае пасьведчаньне.

Але калі аддзел ідэалёгіі аблвыканкаму набярэцца адвагі і ня стане выдаваць пасьведчаньне прыхільніку «славянскага/рускага сьвету», то мо канцэртаў у Віцебскай вобласьці і ня будзе.

Уладзімер Бяляўскі