Панядзелак, 11 Кастрычнік 2021

Прафсаюзны лідар «Нафтану» Аляксандр Балонкін абскардзіў 15 сутак арышту ў абласным судзе. Які вынік?

Ацаніць гэты матэрыял
(5 галасоў)
Віцебскі абласны суд Віцебскі абласны суд

У Віцебскім абласным судзе 11 кастрычніка разглядалася скарга намесніка першаснай арганізацыі Беларускага незалежнага прафсаюзу (БНП) працаўнікоў ААТ «Нафтан» Аляксандра Балонкіна, якога 1 кастрычніка наваполацкі суд пакараў 15 суткамі адміністрацыйнага арышту. Балонкін быў прызнаны вінаватым у распаўсюдзе экстрэмісцкіх матэрыялаў (арт. 19.11 КаАП), бо нібыта размясціў у Instagram фота з плакатам «Я / МЫ ТУТ.бай».

Скаргу ў Віцебскім абласным судзе разглядала суддзя Святлана Іванова.

41-гадовы Аляксандр Балонкін быў затрыманы проста на працоўным месцы 27 верасня пасля ператрусу. Яму выставілі абвінавачанне ў распаўсюдзе экстрэмісцкіх матэрыялаў (ч.2 арт. 19.11 КаАП). На судзе ў Наваполацку (суддзя Зінаіда Балаболава) інжынер-канструктар не прызнаў сябе вінаватым і заявіў, што ён наагул не мае акаўнту ў «Інстаграме».

У абласным судзе суддзя Іванова паведаміла, што Аляксандр быў «прызнаны вінаватым у тым, што, знаходзячыся ў неўстаноўленым месцы ў неўстаноўлены час 18 траўня распаўсюдзіў у інтэрнэце на сваёй старонцы ў сацыяльнай сетцы «Інстаграм» інфармацыйную прадукцыю, уключаную ў рэспубліканскі спіс экстрэмісцкіх матэрыялаў, што было выяўлена ў выніку маніторынгу супрацоўнікамі Наваполацкага РАУС».

У сваёй скарзе Аляксандр Балонкін заявіў, што справа была разгледжаная «аднаасобна, няпоўна і неаб'ектыўна, з істотнымі парушэннямі патрабаванняў заканадаўства». Зазначыў, што ягоная віна не была даказаная матэрыяламі справы. І на гэтай падставе прасіў пастанову наваполацкага суду адмяніць.

Суддзя Святлана Іванова не стала ўлічваць довады супрацоўніка «Нафтану». Яна пастанавіла пакінуць скаргу без задавальнення, а рашэнне суду гораду Наваполацку – без зменаў.

Уладзімір Бяляўскі