У Гомельскім абласным судзе 3 кастрычніка асудзілі па так званай "справе Зельцэра" 38-гадовага палітзняволенага супрацоўніка EPAM і калегу загінулага айцішніка Сяргея Кірэенку. Мужчыну ў закрытым рэжыме судзілі па трох артыкулах Крымінальнага кодэкса: ч. 1 арт. 130 (распальванне сацыяльнай варожасці), арт. 369 (абраза прадстаўніка ўлады), арт. 368 (абраза Лукашэнкі). Суддзя Руслан Царук прызначыў палітвязню тры з паловай гады калоніі ва ўмовах агульнага рэжыму. Пад вартай Сяргей утрымліваецца ўжо год. Суд праходзіў у закрытым рэжыме, таму падрабязнасці справы невядомыя. Вядома толькі, што палітвязня судзілі за каментары ў сацсетках. Сяргея затрымалі 29 верасня наўпрост на гомельскім вакзале каля цягніка — ён збіраўся ехаць у Мінск.
- Сяргей Кірэенка
"Яго затрымлівалі, як у нас традыцыйна затрымліваюць: падыйшлі пяць чалавек у форме без апазнавальных знакаў, скруцілі, зламалі і павезлі ў РАУС. Можна сказаць, што яго выкралі. Нават не прадставіліся і толькі ў мясцовым РАУСе яму сказалі, што ён нібыта праходзіць па справе як сведка. Але потым пачалі "разгойдваць" сітуацыю, выбілі ў яго ўсе паролі і логіны, а там у сацсетках усплылі нейкія перапіскі, каментары. І на падставе гэтых перапісак яго і закрылі", — распавядалі блізкія айцішніка.
Вядома, што Сяргея пасля затрымання збівалі і пагражалі фізічнай расправай.
"Я пабаяўся скаргу пісаць, бо гэтыя пагрозы гучалі пераканаўча", — пісаў потым у лістах Сяргей.
З лістоў Сяргея вынікае, што віну ён не прызнаваў:
"Дык а што я павінен прызнаваць, з чаго і праз які ціск? Прызнаць тое, чаго не было? І быць не магло. Цікавы падыход. Не збіраўся я прызнаваць надуманныя абвінавачванні. Ды і не герой я ніякі. Не збіраюся і не збіраўся ім быць. Я маю права выказацца па некалькіх прычынах. Па-першае, гэта артыкул 33 Канстытуцыі — хоць стары, хоць новы. Па-другое, я жыву ў гэтай краіне, укладаю ў яе грошы. У мяне падаходны большы за заробак у паловы краіны. Эмоцыі? Эмоцыі — не злачынства. Ды толькі апраўдальных прысудаў не выносіцца".
"Эмоцыі — не злачынства". Дзесяць месяцаў за кратамі ўтрымліваецца супрацоўнік EPAM і калега загінулага Андрэя Зельцэра
Адрас для лістоў, пасылак:СІЗА-3, 246003, г. Гомель, вул. Кніжная, 1А, Сяргей Уладзіміравіч Кірэенка (24.07.1984 года) Рэквізіты для грашовых пераводаў: (адвольны плацеж у інтэрнэт-банкінгу ці на пошце): УНП: 490313877 код BIC: BAPBBY2X IBAN: BY31BAPB36429000005630000000 Прызначэнне: на асабістыя патрэбы вязня Сяргея Уладзіміравіча Кірэенкі, СІЗА-3, Гомель. |
Крыніца: Палітзняволенага супрацоўніка EPAM асудзілі па "справе Зельцэра" да 3,5 гадоў калоніі