У судзе Фрунзенскага раёна Мінска 28 кастрыніка працягваўся судовы працэс над сябрамі Аб’яднанай грамадзянскай партыі Артурам Смаляковым, Андрусём Асмалоўскім і Дзіянай Чарнушынай. Усіх іх абвінавачваюць у арганізацыі і падрыхтоўцы дзеянняў, якія груба парушаюць грамадскі парадак, ці актыўным ўдзеле ў такіх дзеяннях (ч.1 арт. 342 Крымінальнага кодэкса).

Судовы працэс вядзе суддзя Ала Скуратовіч, дзяржабвінаваўца – старшы памочнік пракурора Аксана Саковіч.

Палітзняволены Артур Смалякоў – сябра Аб'яднанай грамадзянскай партыі, быў затрыманы 27 ліпеня 2022 года. Пасля 15 сутак адміністрацыйнага арышту на волю не выйшаў. Да суда ўтрымліваўся ў СІЗА №1 Мінска.

Палітзняволены  Андрусь Асмалоўскі – сябра Аб'яднанай грамадзянскай партыі, быў затрыманы 29 ліпеня 2022 года. Да суда ўтрымліваўся ў СІЗА №1 Мінска.

Дзіяну Чарнушыну, грамадзянскую жонку Асмалоўскага, таксама затрымалі 29 ліпеня і змясцілі ў СІЗА №1. У яе на ўтрыманні непаўнагадовае дзіця з інваліднасцю, якога Дзіяна выхоўвала сама.

За ўдзел у "Маршы новай Беларусі" судзяць сябраў АГП

"Марш новай Беларусі" праводзіўся супраць вынікаў прэзідэнцкіх выбараў і жорсткасці міліцыі.

Прадстаўніца дзяржабвінавачання Аксана Саковіч запрасіла для абвінавачаных пазбаўленне волі:

Артуру Смалякову — два гады пазбаўлення волі ва ўмовах агульнага рэжыму;

Дзіяне Чарнушынай — два гады пазбаўлення волі ва ўмовах агульнага рэжыму;

Андрусю Асмалоўскаму  — тры гады пазбаўлення волі ва ўмовах агульнага рэжыму.

Прысуд сябрам АГП будзе абвешчаны 31 кастрычніка ў 11 гадзін.

Крыніца: Абвінавачанне запрасіла пазбаўленне волі для траіх сябраў АГП