У Гродзенскім абласным судзе 9 лістапада працягнулі разгляд крымінальнай справы супраць старшыні першаснай арганізацыі Беларускага Незалежанага прафсаюза працаўнікоў ААТ "Гродна Азот" Андрэя Ханевіча. Гэта ўжо трэцяе пасяджэнне. Абвінавачанне запрасіла 5 гадоў калоніі. Разгляд справы пачаўся 31 кастрычніка. Андрэя Ханевіча абвінавачваюць паводле арт. 369-1 (Дыскрэдытацыя Рэспублікі Беларусь) і арт. 361-4 (Садзейнічанне экстрэмісцкай дзейнасці) Крымінальнага кодэкса.

Андрэй Ханевіч. Фота "Беларускі Незалежны прафсаюз"

Як паведамляе Беларускі Незалежны прафсаюз, мужчыне ставяць у віну размову з журналістам “Белсат”, падчас якой Андрэй “перадаў нейкія звесткі”. Тэлефон Андрэя праслухоўвалі, размовы запісвалі супрацоўнікі спецсулжбаў.

Судовае рашэнне вынясуць 16 лістапада.

Беларускі Незалежны прафсаюз ліквідавалі ўвесну 2022 падчас таго, як Андрэй адбываў адміністратыўны арышт. Прычынаю ліквідацыі прафсаюза стала спроба арганізаваць страйк на прадпрыемстве нібы "выключна ў палітычных мэтах". Пасля звальнення з прадпрыемства на Андрэя завялі крымінальную справу. 

47-гадовы Андрэй Ханевіч працаваў апаратчыкам у цэху "Карбамід - 3" у "Гродна - Азот". Мужчына мае траіх дзяцей. 

Крыніца: У Гродна судзяць прафсаюзнага лідара Андрэя Ханевіча. Яму пагражае 5 гадоў турмы