22.01.2023 Тэгі: адміністратыўны пераслед, пераслед, рэпрэсіі, затрыманні У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 21-22 студзеня 2023 года збірае факты палітычнага пераследу беларусаў – інфармацыя ўвесь час дапаўняецца.

Затрыманы былы выкладчык БДУІР

У Мінску 18 студзеня затрымалі Мікалая Васільевіча Банькова, былога выкладчыка кафедры сувязі БДУІР. Гэтая кафедра прызначана для падрыхтоўкі кадравых афіцэраў для Узброеных Сіл і іншых сілавых структур і ведамстваў Рэспублікі Беларусь па спецыяльнасці.

Прычыны затрымання пакуль невядомыя.

Затрымалі аспіранта гістфака БДУ Юрыя Уласюка 

Паводле @volnyBDY, затрыманне адбылося яшчэ ў снежні 2022 году. Юрыю інкрымінаваны арт. 342 КК (удзел у дзеяннях, якія груба парушаюць грамадскі парадак).

Супраць віцебскага арт-менеджара Уладзіміра Булаўскага распачалі крымінальную справу

Паводле інфармацыі @zamkadomby, сілавікі знайшлі ў яго фотаздымкі з паслявыбарчых акцый пратэсту.

Нагадаем, што Уладзімір быў затрыманы 14 снежня мінулага году і мусіў вызваліцца пасля «сутак» 1 студзеня, але на волю так і не выйшаў.

15-гадовага брата адміністратара каналу «Супольнасць чыгуначнікаў Беларусі» затрымаў КДБ

Супрацоўнікі КДБ выставілі ўмову выдаліць канал і спыніць дзейнасць – верагодна, тады бы брата адпусцілі.

У ІЧУ на Акрэсціна хлопца трымалі трое сутак. Супраць яго распачалі крымінальную справу за «вымагальніцтва». Бацькоў і адваката да хлопца не пускалі.

У пятніцу 15-гадовага хлопца перавялі ў «Навінкі».

Палітыка Андрэя Дзмітрыева перавялі ў СІЗА-1 на Валадарскага 

Нагадаем, былы сустаршыня руху «Гавары праўду» быў затрыманы 11 студзеня. Яго абвінавачваюць паводле ч. 1 арт. 342 Крымінальнага кодэкса ў «арганізацыі і падрыхтоўцы дзеянняў, якія груба парушаюць грамадскі парадак».

Падтрымаць яго можна па адрасе: Мінск, СІЗА-1, Валадарскага 2, 220030

У Слоніме затрымалі актывіста Алеся Масюка 

Яго абвінавачваюць у «распаўсюдзе экстрэмісцкіх матэрыялаў» паводле ч. 2 арт. 19.11 КаАП. Да суда Алеся змясцілі ў ІЧУ Слоніма.

Раніцай 21 студзеня ў Мінску быў затрыманы Павел Падабед

Прычыны і падрабязнасці затрымання пакуль невядомыя. Вядома, што восенню 2020-га Паўла затрымлівалі пасля адной з акцый пратэсту.

Крыніца: Хроніка палітычнага пераследу на выходных 21-22 студзеня Дапоўнена