04.04.2023 На 52-й сесіі ААН прынялі рэзалюцыю Савета па правах чалавека пра Становішча ў галіне правоў чалавека ў Беларусі напярэдадні прэзідэнцкіх выбараў 2020 і пасля. Гэта значыць, што мандат місіі УВКПЧ ААН (examination mission) па разгляду сітуацыі з правамі чалавека ў Беларусі працягнуты яшчэ на адзін год.

У рэзалюцыі Генеральнай Асамблеі Савет па правах чалавека:

  • пастанаўляе працягнуць на адзін год мандат Вярхоўнага камісара Арганізацыі Аб'яднаных Нацый па правах чалавека пры садзейнічанні трох прызначаных незалежных экспертаў і мандатарыяў спецыяльных працэдур да пяцьдзясят пятай сесіі Савета па правах чалавека;
  • просіць Вярхоўнага камісара вусна падаць Савету па правах чалавека на яго пяцьдзясят чацвёртай сесіі прамежкавую абноўленую інфармацыю, а на яго пяцьдзясят пятай сесіі — усёабдымны пісьмовы даклад з наступным правядзеннем у кожным выпадку інтэрактыўнага дыялогу;
  • просіць Генеральнага сакратара аказваць Упраўленню Вярхоўнага камісара ўсебаковую адміністрацыйную, тэхнічную і лагістычную падтрымку і даваць яму рэсурсы, неабходныя для выканання яго мандата.

Савет па правах чалавека павітаў усёабдымны пісьмовы даклад, прадстаўлены Вярхоўным камісарам Савету на бягучай сесіі. Пра яго "Вясна" пісала тут:

"Апагей беларускай беззаконнасці". Што казалі пра Беларусь у ААН

"Вусная заява ў межах інтэрактыўнага дыялогу з экспертамі УВКПЧ па Беларусі падчас 52-й сесіі Савета ААН па правах чалавека" прайшла ў Жэневе. На ёй падалі даклад па Беларусі, а таксама выступілі зацікаўленыя краіны, дэлегацыя Беларусі і НДА. "Вясна" распавядае, што яны казалі.

 Акрамя таго, Савет па правах чалавека:

  • выказаў глыбокую занепакоенасць з нагоды далейшага пагаршэння становішча ў галіне правоў чалавека ў Беларусі пасля прэзідэнцкіх выбараў, якія адбыліся 9 жніўня 2020 года, захавання праблемы беспакаранасці і непрыцягнення да адказнасці вінаватых у парушэннях правоў чалавека, учыненых у Беларусі з 1 траўня 2020 года;
  • асудзіў у сувязі з гэтым практыку сістэматычнай адмовы ў правах чалавека і асноўных свабодах, якая захоўваецца ў Беларусі, у тым ліку ў кантэксце ўтрымання пад вартай больш за 1462 палітычных зняволеных і адвольных затрыманняў і арыштаў прадстаўнікоў апазіцыі, журналістаў і іншых работнікаў сродкаў масавай інфармацыі, абаронцаў навакольнага асяроддзя і праваабаронцаў, уключаючы праваабаронцаў, адвакатаў, медыцынскіх работнікаў, дзеячаў культуры, настаўнікаў, студэнтаў, дзяцей, асоб, якія належаць да нацыянальных меншасцяў, членаў прафсаюзаў і страйкавых камітэтаў і іншых прадстаўнікоў грамадзянскай супольнасці і асобных асоб за іншадумства і ажыццяўленне сваіх правоў чалавека і асноўных свабод;
  • асудзіў дзеянні беларускіх уладаў, якія ўчынілі акт незаконнага ўмяшання, які наўмысна паставіў пад пагрозу тэхнічную і фізічную бяспеку грамадзянскага рэйса ў паветранай прасторы Беларусі ў траўні 2021 года і жыцці ўсіх, хто знаходзіўся на борце;
  • зноў выказаў шкадаванне з нагоды таго, што беларускія ўлады не выконваюць свае абавязацельствы ў дачыненні да права кожнага грамадзяніна галасаваць і быць абраным на свабодных, справядлівых і інклюзіўных перыядычных выбарах.

У галасаванні па рэзалюцыі ўдзельнічалі 47 краін. Супраць працягу мандата па Беларусі выступілі 5 краін (Балівія, Кітай, Куба, Эрытрэя, В'етнам).

Файлы

Крыніца: Мандат місіі УВКПЧ ААН па сітуацыі ў Беларусі працягнуты на адзін год Дакумент