30.04.2023 Тэгі: суды, крымінальны пераслед, палітвязні, рэпрэсіі У Чыгуначным раёне Гомеля 28 красавіка агучылі прысуд па трэцяй крымінальнай справе супраць пружанскай актывістцы Алене Гнаук — адзін год пазбаўлення волі ва ўмовах агульнага рэжыму. Канчатковы тэрмін пакарання складае два гады і 11 месяцаў зняволення. Гэтым разам Алену абвінавацілі паводле ч. 1 арт. 411 КК за "злоснае непадпарадкаванне патрабаванням адміністрацыі папраўчай калоніі". Хутка яе этапуюць у СІЗА да разгляду апеляцыйнай скаргі, таму цягам гэтага перыяду яе можна падтрымліваць грашовымі пераводамі і пасылкамі.
- Алена Гнаук
Алена Гнаук — пружанская актывістка, якую з 2020 года мэтанакіравана пераследавалі: затрымлівалі і арыштоўвалі па адміністрацыйных артыкулах 17 разоў, штрафавалі агулам на 173 базавых велічыні, дома праводзілі ператрусы, асудзілі па "справе карагодаў" і за абразу Лукашэнкі па крымінальных артыкулах.
Калі жанчына ўжо адбывала "хатнюю хімію" па першай крымінальнай справе, яе некалькі разоў затрымлівалі. 11 студзеня 2022 года яе затрымалі і прызначылі 15 сутак арышту за парушэнне рэжыму адбывання "хатняй хіміі". Пасля арышту Алена не выйшла на волю, яе перавялі ў СІЗА ў межах крымінальнай справы, узбуджанай паводле двух артыкулаў Крымінальнага кодэксу: арт. 367 КК (Паклёп на прэзідэнта) і арт. 369-1 (Дыскрэдытацыя Рэспублікі Беларусь).
Згодна з матэрыяламі справы, Гнаук 23 лістапада 2021 года размясціла ў сацыяльных сетках Facebook і Instagram "свядома ілжывыя звесткі аб прававым становішчы замежных грамадзян у Рэспубліцы Беларусь, што было накіравана на прычыненне істотнай шкоды дзяржаўным інтарэсам". У пастах Алена распавядала пра курдскія сем’і і становішча мігрантаў у Беларусі. Паклёп на Лукашэнку выявілі ў "звароце" да яго.
У судзе Пружанскага раёна 17 чэрвеня 2022 года ёй прызначылі тры з паловай гады калоніі ва ўмовах агульнага рэжыму і штраф 3200 рублёў.
Актывістку з Пружанаў Алену Гнаук асудзілі да трох з паловай гадоў калоніі
15 жніўня перавялі ў папраўчую калонію № 4 для адбыцця пакарання. Амаль увесь час жанчыну ўтрымлівалі ў штрафным ізалятары, а нядаўна яе змясцілі ў ПКТ да 24 лютага. Таксама Алену пазбавілі амаль усіх перадач, званкоў, спатканняў і скарацілі атаварку з 3 базавых велічыняў да 1 (37 рублі). У зняволенні ў жанчыны пагоршылася здароўе. У траўні яна тыдзень трымала галадоўку і патрабавала аддаць ёй карэспандэнцыю.
Акрамя гэтага, па ініцыятыве адміністрацыі гомельскай калоніі супраць Алены ўзбудзілі крымінальную справу паводле ч. 1 арт. 411 КК за "злоснае непадпарадкаванне патрабаванням адміністрацыі калоніі".
Суд Чыгуначнага раёна Гомеля пачаў разгляд справы 11 красавіка на выязным пасяджэнні ў гомельскай калоніі. Справу разглядае суддзя Яраслаў Парэмскі.На другім пасяджэнні дапытвалі сведкаў, якія блыталіся ў адказах, а саму палітзняволеную выдалілі з залі суда.
Вядома, што палітзняволеная адмовілася ад адвакаткі, бо тая падпісала пратакол допыту, нягледзячы на просьбу Алены не рабіць гэтага.
28 красавіка суддзя Парэмскі агучыў прысуд палітзняволенай — прызнаць яе вінаватай і прызначыць ёй адзін год пазбаўлення волі ў дадатак да трох з паловай гадоў калоніі. З улікам тэрміну, які Алена ўжо адбыла ў калоніі, ёй засталося адбыць два гады і 11 месяцаў.
Паводле сваякоў палітзняволенай, 2 траўня яе этапуць у СІЗА, дзе яна будзе чакаць разгляду апеляцыйнай скаргі.
Крыніца: Палітзняволеную актывістку Алену Гнаук асудзілі да яшчэ аднаго года калоніі