30.08.2023 Тэгі: суды, грамадства, вайна ва Украіне У судзе Наваполацка 17 жніўня адбыўся суд над мясцовым жыхаром, якога затрымалі напярэдадні раніцай. Мужчыну абвінавацілі паводле арт. 24.23 КаАП (несанкцыянаванае пікетаванне). Падставай для затрымання стаў апаблікаваны ў Instagram фотаздымак мужчыны з адпачынку ў Грузіі, на якім ён стаіць на фоне гор і сцягоў Грузіі і Украіны. Пры гэтым фота было апублікавана яшчэ 8 жніўня 2021 года, але міліцыянты заўважылі яго толькі праз два гады.
- Фота ілюстрацыйнае
Так, паводле пратакола, мужчына "ў перыяд часу з 8 жніўня 2021 года па 12:00 11 ліпеня 2023 года правёў несанкцыянаванае пікетаванне, выказваючы грамадска-палітычныя, асабістыя і іншыя інтарэсы, шляхам апублікавання ў агульным доступе на сваёй старонцы ў Instagram для азнаямлення іншымі карыстальнікамі фотаздымку сябе і выявы палатніны сіне-жоўтага колеру".
Навапалачанін у судзе віну прызнаў часткова. Ён растлумачыў, што ў памяць пра турыстычнае падарожжа ў Грузію ў 2021 годзе размясціў на сваёй старонцы фата, на якім таксама была выява сцягоў Грузіі і Украіны, аднак не меў мэты правесці пікетавання. Акрамя гэтага, ён адзначыў, што "факт публікацыі фота з выявай сцяга Украіны і падзеямі, якія адбываюцца ва Украіне — супадзенне".
У выніку суддзя Зінаіда Балаболава прызнала мужчыну вынаватым у пікетаванні ўкраінскім сцягам і асудзіла яго да 15 сутак арышту.
Праваабаронцы звяртаюць увагу, калі вы выязджалі з Беларусі на адпачынак, калі ласка, уважліва праглядзіце апублікаваныя фота ў сацыяльных сетках і схавайце тыя, на якіх бачныя украінскі або бел-чыровна-белы сцягі — яны могуць стаць трыгерам для сілавікоў і стварыць нагоду для пераследу.