11.09.2023 Тэгі: суды, крымінальны пераслед, экстрэмізм Следчы камітэт 8 верасня распачаў спецыяльную вытворчасць у дачыненні да прадстаўнікоў і экс-удзельнікаў арганізацыі BYPOL з структурнымі падраздзяленнямі "Сітуацыйна-аналітычны цэнтр" і "Мабілізацыйны план «Перамога»". Завочна збіраюцца судзіць шэсць былых сілавікоў: Андрэя Астаповіча, Аляксандра Азарава, Алега Талерчыка, Уладзіміра Жыгара, Мацвея Купрэйчыка і Ігара Лобана. Усе абвінавачваюцца ў "распальванні іншай сацыяльнай варожасці", "змове з мэтай захопу або ўтрымання дзяржаўнай улады неканстытуцыйным шляхам" і "стварэнні экстрэмісцкага фармавання". Аляксандру Азараву агулам выставілі дзесяць артыкулаў.
Паведамляецца, што адпаведнае рашэнне ўзгоднена Генеральным пракурорам Беларусі.
Іх абвінавачваюць паводле шэрагу цяжкіх артыкулаў Крымінальнага кодэкса:
- Аляксандра Азарава — ч. 3 арт. 130 (распальванне іншай сацыяльнай варожасці), арт. 188 (паклёп), ч. 4 арт. 16 і ч. 3 арт. 289 (арганізацыя акта тэрарызму), ч. 4 арт. 16, арт. 18 і ч. 2 і 4 арт. 309 (арганізацыя наўмыснага прывядзення ў непрыдатнасць транспартнага сродку або шляхоў зносін), ч. 1 арт. 356 (здрада дзяржаве), ч. 1 арт. 357 (змова ці іншыя дзеянні, учыненыя з мэтай захопу або ўтрымання дзяржаўнай улады неканстытуцыйным шляхам), ч. 3 арт. 361 (заклікі да санкцыяў), ч. 1 і 2 арт. 361-1 (стварэнне экстрэмісцкага фармавання), ч. 2 арт. 368 (абраза Лукашэнкі), арт. 369 (абраза прадстаўніка ўлады);
- Уладзіміра Жыгара, Мацвея Купрэйчыка, Ігара Лобана і Андрэя Астаповіча, Алега Талерчыка — ч. 3 арт. 130 (распальванне іншай сацыяльнай варожасці), ч. 1 арт. 357 (змова ці іншыя дзеянні, учыненыя з мэтай захопу або ўтрымання дзяржаўнай улады неканстытуцыйным шляхам), ч. 1 і 2 арт. 361-1 (стварэнне экстрэмісцкага фармавання).
Мацвея Купрэйчыка таксама абвінавачваюць паводле арт. 369 (абраза прадстаўніка ўлады), а Алега Талерчыка яшчэ паводле ч. 3 арт. 203-1 (незаконныя дзеянні ў дачыненні да інфармацыі аб прыватным жыцці і персанальных дадзеных), ч. 3 арт. 361 (заклікі да санкцыяў), ч. 1 арт. 361-4 (садзейнічанне экстрэмісцкай дзейнасці), ч. 2 арт. 367 (паклёп на Лукашэнку).
8 лістапада 2021 года і мабілізацыйны план "Перамога" прызналі "экстрэмісцкім фармаваннем". 31 жніўня 2022 года Вярхоўны суд прызнаў BYPOL з структурнымі падраздзяленнямі "Сітуацыйна – аналітычны цэнтр" і "Мабілізацыйны план «Перамога»" тэрарыстычнай арганізацыяй. Гэта адбылося па заяве Генпракурора Андрэя Шведа.
Нагадаем, 28 красавіка гэтага года да 18 гадоў калоніі завочна асудзілі былога афіцэра ГУБАЗіКа Станіслава Лупаносава. Яго абвінавацілі па трох артыкулах Крымінальнага кодэкса: ч. 1 арт. 356 (здрада дзяржаве), арт. 352 (неправамернае завалоданне камп'ютарнай інфармацыяй), ч. 3 арт. 426 (перавышэнне ўлады альбо службовых паўнамоцтваў). Разгляд справы цягнуўся тры тыдні ў закрытым рэжыме.Станіслаў — падпалкоўнік ГУБАЗІКу, падчас службы супрацоўнічаў з BYPOL.