11.10.2023 Тэгі: крымінальны пераслед, праваабаронцы, рэпрэсіі, міжнародная салідарнасць праваабаронцаў У кастрычніку, па-ранейшаму, працягваюцца рэпрэсіі супраць праваабаронцаў і праваабарончых арганізацый не толькі ў Беларусі, але і ў суседніх краінах: Нобелеўская прэмія міру ўручаная іранскай праваабаронцы, ў Расіі завяршаецца суд над сустаршынёй Цэнтра абароны правоў чалавека “Мемарыял” Алегам Арловым, у Крыме ахвярам палітычна матываваных прысудаў вынеслі больш за 900 год калоніі.

Другі раз запар Нобелеўскую прэмію міру прысуджаюць праваабаронцам-палітвязням

6 кастрычніка сталі вядомыя лаўрэаты Нобелеўскай прэміі міру. У 2023 годзе на яе былі намінаваны 351 кандыдат: 259 чалавек і 92 арганізацыі. 

Нобелеўская прэмія міру 2023 года ўручана іранскай актывістцы па абароне правоў чалавека Наргіз Махамадзі за барацьбу з іранскім рэжымам, які прыгнятае правы жанчын у краіне.

Наргіз Махамадзі. Фота bbc.com

Абвяшчаючы імя лаўрэата, кіраўнік нарвежскага камітэта Берыт Рэйс-Андэрсан пачала сваю прамову са слогана, пад якім тысячы іранскіх жанчын выйшлі на вуліцы Ірана пасля гібелі ад рук паліцыі нораваў маладой іранкі Махсы Аміні, - "Жанчыны. Жыццё. Свабода".

"Наргіз Махамадзі прысуджаная да 31 года турэмнага зняволення і 154 ударам кнутом, і знаходзіцца ў турме прама цяпер, пакуль я прамаўляю гэтыя словы", — сказала Рэйс-Андэрсан.

У 2022 годзе Нобелеўскія прэміі міру атрымалі арганізацыі "Мемарыял", якую ліквідавалі па рашэнні Вярхоўнага суда і ўкраінскі "Цэнтр грамадзянскіх свабод". Узнагародай быў адзначаны вядомы праваабаронца з Беларусі Алесь Бяляцкі.

Праваабаронцу Алегу Арлову могуць абвясціць прысуд

У Галавінскім раённым судзе Масквы 11 кастрычніка пройдуць спрэчкі па справе сустаршыні праваабарончага цэнтра “Мемарыял" Алега Арлова. Пасля гэтага ён выступіць з апошнім словам. Бок абароны не выключае, што ў гэты ж дзень суд можа вынесці прысуд.

Алега Арлова пераследуюць па артыкуле аб “паўторнай дыскрэдытацыі” арміі за яго антываенную пазіцыю, піша "Цэнтр Мемарыял".

Алег Арлоў — расійскі праваабаронца, сустаршыня Цэнтра абароны правоў чалавека «Мемарыял». Выбітнага мемарыяльца, які на свае вочы бачыў жахі вайны і больш за 40 гадоў змагаўся за мір, пераследуюць за антываенныя погляды.

У сакавіку Алег Арлоў меў намер трапіць на суд да калегі, праваабыронцы Алеся Бяляцкага, аднак яму забаранілі ўезд у Беларусь. Алег Арлоў назваў суд над нобелеўскім лаўрэатам Алесем Бяляцкім і ягонымі калегамі «праявай фашызму».

21 сакавіка раніцай сілавікі правялі ператрус у кватэры Алега Арлова і яшчэ васьмі сябраў «Мемарыялу». Гэта адбылося ў межах крымінальнай справы аб» рэабілітацыі нацызму " (ч.2 арт. 354.1 КК). Пасля допытаў усіх адпусцілі ў статусе сведак.

Аднак у той жа дзень Следчы камітэт распачаў у дачыненні да Арлова крымінальную справу аб “паўторнай дыскрэдытацыі” расейскага войска (ч.1 арт. 280.3 КК). 

8 чэрвеня прайшло першае пасяджэнне па сутнасці па справе Арлова. Сустаршыні цэнтра “Мемарыял” пагражае да трох гадоў пазбаўлення волі.

На вядомага расійскага адваката Іллю Новікава завялі крымінальную справу аб дзяржздрадзе

У дачыненні да адваката Іллі Новікава, які з’ехаў ва Украіну, была ўзбуджаная крымінальная справа па артыкуле аб дзяржздрадзе з-за пераходу “на бок праціўніка”. Пра гэта паведаміў Цэнтр грамадскіх сувязяў ФСБ Расеі. Раней у РФ яго пазбавілі адвакацкага статусу і абвясцілі ў вышук.

Ілля Новікаў на судзе над Аюбам Ціціевым.

Паводле звестак ФСБ, спадар Новікаў уступіў у шэрагі УСУ, прайшоў вайсковую падрыхтоўку, удзельнічае ў баявых дзеяннях і “займаецца прапагандысцкай працай. 275 КК РФ (дзяржаўная здрада ў форме пераходу на бок праціўніка). Вядзецца следства.

1 снежня 2022 года МУС Расіі абвясціла Іллю Новікава ў вышук, аднак у матэрыялах ведамства не паказвалася, па якім артыкуле. 25 лістапада 2022 года спадар Новікаў быў прызнаны ў Расіі замежным агентам за ажыццяўленне палітычнай дзейнасці. Замежнай крыніцай фінансавання ў рэестры паказаная Украіна.

Ілля Новікаў удзельнічаў у шэрагу рэзанансных спраў, у прыватнасці выступаў з абаронай Фонду барацьбы з карупцыяй (прызнаны экстрэмісцкай арганізацыяй і забаронены, прызнаны замежным агентам, ліквідаваны), абараняў Новікаў захопленую ў палон украінскую лётчыцу Надзею Саўчанку і рэжысёра Алега Сянцова, а таксама чачэнскага праваабаронцу Аюба Ціціева.

Палітычна матываваны пераслед у Крыме: ахвяраў этапуюць у Расію

Сумарны тэрмін прысудаў ахвярам палітычна матываваных пераследаў у Крыме з пачатку поўнамаштабнага ўварвання Расеі ва Украіну склаў 915 гадоў і 5 месяцаў. Пра гэта распавёў аналітык Крым SOS Яўген Ярашэнка."З 24 лютага 2022 года прынамсі 78 крымскіх палітвязняў былі прысуджаныя сумарна да 915 гадоў і 5 месяцаў пазбаўлення волі», — кажа аналітык.

Ілюстрацыйнае фота.

З пачатку акупацыі Крыма Расеяй, крымскія палітвязні пасля прысуду часта становяцца ахвярамі незаконнага этапавання ў расейскія месцы адбыцця пакарання. Толькі ў 2023 годзе ў расейскія турмы і калоніі былі этапаваныя 25 чалавек.

Нагадаем, што этапаванне грамадзянскіх асоб, у тым ліку палітвязняў, з Крымскага паўвострава на тэрыторыю Расеі з'яўляецца ваенным злачынствам. Такімі дзеяннямі акупанты парушаюць артыкулы 49 і 76 IV Жэнеўскай канвенцыі. Згодна з артыкулам 76 IV Жэнеўскай канвенцыі, "абвінавачаныя ў здзяйсненні злачынства павінны знаходзіцца ў акупаванай краіне, а ў выпадку асуджэння павінны там адбываць тэрмін пакарання".

Большасць ахвяр палітычна матываваных пераследаў у Крыме - прадстаўнікі крымскататарскага народа. На думку Яўгена Ярашэнкі, расейскія акупацыйныя ўлады ў Крыме спрабуюць выдаць крымскіх татараў за экстрэмістаў і дыверсантаў.

Рух у абарону правоў выбаршчыкаў "Голас" уцягнулі ў “дыскрэдытацыю”

У сябраў расійскага руху ў абарону правоў выбаршчыкаў "Голас" 5 кастрычніка прайшла серыя ператрусаў па крымінальнай справе аб паўторнай дыскрэдытацыі арміі.

Ператрусы раніцай 5 кастрычніка прайшлі ў маскоўскім офісе "Голасу", у яго сустаршыні Рыгора Мельканьянца і сябраў Рады Руху Віталя Ковіна, Аркадзя Любарава (абодва прызнаныя інаагентамі) і Ірыны Мальцавай, а таксама дома ў электаральнага аналітыка Сяргея Шпількіна, які пакінуў Расею, які супрацоўнічаў з праваабаронцамі. Акрамя іх, сілавікі прыйшлі да муніцыпальнага дэпутата з Цвярской вобласці Мікалая Кузьміна, актывістцы ад "Яблыка" Кацярыне Новікавай і журналісту выдання "Пскоўская губерня" Дзянісу Камалягіну.

Днём раней ператрусы прайшлі ў каардынатара "Голасу" ў Чэлябінскай вобласці Ірыны Гусевай. Увечары яшчэ аднаго маскоўскага актывіста “Голасу" Уладзіміра Ягорава павезлі ў аддзяленне, абвінаваціўшы ў непадпарадкаванні паліцыі.

Крыніца: Пераслед абаронцаў правоў чалавека: дайджэст міжнародных навінаў