27.10.2023 Тэгі: суды, крымінальны пераслед У судзе Ленінскага раёну Мінска дзявятага кастрычніка асудзілі Наталлю Ліцвіненка і Васіля Крэза паводле ч. 1 арт. 342 (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзелу іх) Крымінальнага кодэкса. Суддзя Анастасія Ачалава прызначыла Наталлі і Васілю па два гады абмежавання волі без накіравання ў папраўчую ўстанову адкрытага тыпу ("хатняй хіміі").
- Наталля Ліцвіненка і Васіль Крэз. Фота з сацыяльных сетак
Наталлю і Васіля абвінавацілі ва ўдзеле ў акцыі пратэсту ў Мінску ў 2020 годзе, выхадзе на праезную частку і перакрыцці руху грамадскага транспарту. Яны цалкам прызналі віну. Беларусаў апазналі па відэазапісу.
Да суда абое знаходзіліся пад закладам па 7400 рублёў.
46-гадовы Васіль Крэз – ураджэнец Магілёва. Скончыў Мінскі дзяржаўны лінгвістычны ўніверсітэт, факультэт гішпанскай мовы. У пачатку нулявых пару гадоў працаваў выкладчыкам у Беларуска-расійскім універсітэце ў Магілёве. Апошнім часам перакладаў з гішпанскай, партугальскай і ангельскай моваў як індывідуальны прадпрымальнік.
Наталля Ліцвіненка мае вышэйшую адукацыю, працавала галоўнай бухгалтаркай у таварыстве з абмежаванай адказнасцю.