15.11.2023 Тэгі: суды, крымінальны пераслед Суд Цэнтральнага раёна Гомеля накіраваў на прымусовае лячэнне ў псіхіятрычны стацыянар Валерыя Яроцкага, якога абвінавачвалі ў  паклёпе (арт. 188 КК) і паклёпе на Аляксандра Лукашэнку (ч. 2 арт. 367 КК). Пастанову прыняў суддзя Віктар Казачак яшчэ 19 ліпеня, аднак падрабязнасці справы сталі вядомыя праваабаронцам толькі зараз.

Валерый Яроцкі – ураджэнец Жлобіна, неаднаразова з’яўляўся назіральнікам на выбарах ад БХК. У 2019 годзе мужчына стаў чэмпіёнам горада па шахматах, а яшчэ выйграў хуткі турнір у Асіповічах.

Па матэрыялах справы, Яроцкі адправіў у КДБ, МУС, пракуратуру і Цэнтральную камісію па выбарах і рэферэндумах рукапісныя і электронныя лісты, у якіх абвінаваціў Лукашэнку ў цяжкіх злачынствах.

Так ён, нібыта “падрыхтаваў друкаваныя і рукапісныя тэксты, у якіх ўтрымліваюцца загадзя ілжывыя і прыніжаючыя гонар і годнасць звесткі ў дачыненні да Прэзідэнта Рэспублікі Беларусь, у тым ліку спалучаныя з абвінавачваннем у здзяйсненні цяжкіх і асабліва цяжкіх злачынстваў. Затым накіраваў друкаваныя і рукапісныя тэксты ў адрас дзяржаўных органаў пракуратуры Рэспублікі Беларусь, КДБ Рэспублікі Беларусь, Міністэрства унутраных спраў, Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў і іншых дзяржаўных устаноў, даступных для свабоднага прагляду, капіявання і азнаямлення шырокага кола асоб”.

Падобныя лісты ён падрыхтаваў і ў дачыненні да аднаго з пракурораў Гомельскай вобласці. Што менавіта было ў тэкстах зваротаў, не ўдакладняецца.

Суд прызнаў Яроцкага хворым на псіхічны разлад і накіраваў яго на прымусовае лячэнне, забараніўшы пакідаць краіну.

Крыніца: Гамельчука накіравалі на прымусовае лячэнне з-за паклёпу на Аляксандра Лукашэнку