Пракуратура Слуцкага раёна адрэагавала на скаргу журналіста рэгіянальнай газеты “Інфа-Кур’ер” Сержука Кійко, якую ён падаў на ўмовы ўтрымання ў ІЧУ Слуцкага РАУС.
“У выніку праведзенай пракуратурай Слуцкага раёна праверкі ў ІЧУ ўстаноўлены парушэнні заканадаўства аб матэрыяльна-бытавым забеспячэнні адміністратыўна арыштаваных, у тым ліку і парушэнні, якія пададзеныя ў скаргах. Вынесена прадпісанне аб выпраўленні парушэнняў заканадаўства”, – адказаў журналісту намеснік пракурора Слуцкага раёна І. Слука.
У мясцовым ізалятары часовага ўтрымання Кійко ўтрымліваўся з 3 па 6 красавіка пасля пераводу з Жодзінскага СІЗА, , адбываючы частку адміністратыўнага арышту за ўдзел у акцыі пратэсту на Дзень Волі ў Менску.
Дзякуючы гэтаму пераводу Сяржук Кійко атрымаў магчымасць параўнаць умовы ўтрымання ў Жодзіна і ў Слуцку, прычым гэтае параўнанне атрымалася не на карысць роднага горада:
– Відаць ў Жодзіна рыхтаваліся да “прыёму” адміністратыўна арыштаваных удзельнікаў Дня Волі, бо выдавалі нам чыстыя коўдры і рушнікі, камеры былі прыбраныя і памытыя, пры неабходнасці да хворых выклікалі лекара і ён хутка з’яўляўся. А вось у Слуцкім ІЧУ мне кінуўся ў вочы страшэнны бруд, камера смярдзела, нават рушніка не выдалі. За чатыры дні ніводнага разу не выводзілі на прагулку.
Асобна Сяржук Кійко адзначае дрэнную якасць харчавання і мізэрныя порцыі. Асартымент страў практычна не мяняўся некалькі дзён, тройчы кармілі надта “пахучай” рыбай. Прыёмы ежы былі шчыльна ссунуты па часе: сняданак – у 11 гадзін, абед – у 13 гадзін, вячэра – ў 17 гадзін. І таму вечарам хацелася ізноў есці. І гэта пры тым, што ніводнай перадачы ў яго не было, паколькі родных Сержука не папярэдзілі, што ён у Слуцкім СІЗА.
Яшчэ адзін зварот Сяржука Кійко быў разгледжаны ў Рэспубліканскім цэнтры гігіены і эпідэміялогіі Дэпартаменту фінансаў і тылу МУС, якія правялі свой маніторынг ізалятара часовага ўтрымання ў Слуцку. У межах кампетэнцыі гэтай ўстановы было вынесенае заключэнне, што факты парушэнняў, пра якія вялася гаворка ў звароце, часткова мелі месца. Кіраўніцтву ІЧУ былі дадзены прапановы па іх выкараненні і ўзмацненню кантролю за захаваннем санітарна-эпідэміялагічных патрабаванняў.
І толькі Слуцкі РАУС, разгледзеўшы аналагічную скаргу журналіста прыйшоў да высновы, што “недахопаў у матэрыяльна-бытавым і санітарна-гігіенічным забеспячэнні адміністратыўна арыштаваных не было”.
Начальнік раённай міліцыі В. Герэга паведаміў Кійко, што “факты, выкладзеныя ў скарзе на парадак і ўмовы ўтрымання у ІЧУ Слуцкага РУУС не знайшлі свайго падцверджання”.
Вось ужо сапраўды, хаця і не любіць слуцкая міліцыя смецце з хаты выносіць, але на гэты раз давядзецца.
Крыніца: Пракуратура і РУУС па-рознаму зрэагавалі на скаргу па ўмовах ўтрымання ў Слуцкім ІЧУ