Паліцыя Чачні спыніла крымінальную справу супраць спартсмэна Мурада Амрыева. Яго падазравалі ў выкарыстаньні падробленага пашпарта, - піша Радыё Свабода.
Як паведамляе «Інтэрфакс» са спасылкай на МУС рэспублікі, 4 чэрвеня Амрыева, які быў у вышуку ў Чачні, зьнялі зь цягніка ў Бранску. Затым паведамлялася, што ён нібыта зьбег з будынку Сьледчага камітэта, а пазьней быў затрыманы на тэрыторыі Беларусі, перададзены Расіі і адпраўлены ў Чачню.
Паводле праваабаронцаў, падставай для перасьледу чэмпіёна сьвету па зьмешаных адзінаборствах сталі заявы Амрыева ў матэрыяле «Новой газеты» аб «кроўнай помсьце», абвешчанай яму чачэнскімі паліцыянтамі. У 2013 годзе, паводле зьвестак выданьня, спартсмэн зьвярнуўся да праваабаронцаў, сьцьвярджаючы, што яго выкралі і катавалі супрацоўнікі МУС Чачні.