Як паведаміла ПЦ "Вясна" жонка зняволенага Людміла Кучура, у тэлефоннай размове муж распавёў ёй, што на яго было накладзена новае спагнанне, якое стала падставай для пазбаўлення яго доўгатэрміновага спаткання. На гэты раз Пятра Кучуру абвінавацілі ў стварэнні канфліктнай сітуацыі з іншымі асуджанымі і хутчэй за ўсё «кінулі» ў ШІЗА, так як запланаваны тэлефонны званок родным не адбыўся.
«Апошнія спатканне з мужам было 15 студзеня 2018 года. Накладзенае спагнанне падышло як раз да моманту, калі павінна было адбыцца наша спатканне, але верагодна адміністрацыя калоніі баіцца, што Пётр можа распавесці мне пра тое, што на самой справе адбываецца за кратамі.
Цікава, што такой фармулёўкі пры накладанні спагнанняў у нас яшчэ не было!» - адзначае Людміла Кучура.
Муж таксама расказаў ёй, што падчас асабістай размовы начальнік калоніі Аляксей Лазарэнка сказаў, што мяркуе, што жонка зняволенага будзе пісаць скаргі, але ён нікога і нічога не баіцца.
Вядома, Людміла Міхайлаўна звярнулася са скаргай да начальніка Дэпартамента выканання пакаранняў Алега Маткіна, у якой указала на неабгрунтаваны ціск на Пятра Кучура з боку адміністрацыі ПК-15 - пазбаўленне яго чарговага доўгатэрміновага спаткання, канфіскацыя двух лістоў ад 2го і 8го снежня, а таксама на бяздзейнасць з боку ДВП па абароне правоў зняволеных і беспакаранасць супрацоўнікаў калоніі.
Прыкладам такой бяздзейнасці з'яўляецца праверка, праведзеная ў красавіку гэтага года першым намеснікам начальніка ДВП Іванам Мысліцкім, які ў размове з Пятром Кучурай паўтараў, што ён яму не верыць, а верыць начальніку калоніі, і ніякіх парушэнняў з боку адміністрацыі папраўчай установы ў дачыненні да асуджанага не ўгледзеў.
«Менавіта кіраўніцтва Дэпартамента выканання пакаранняў і пакрывае незаконныя дзеянні Аляксея Лазарэнкі ў адносінах да майго мужа і іншых асуджаных.
У выніку ліпавых праверак па нашых скаргах мы атрымліваем адпіскі, а тыя, на каго абгрунтавана скардзімся, застаюцца беспакаранымі», - адзначала ў скарзе Людміла Кучура.
Яна прасіла ДВП правесці аб'ектыўную праверку аб абгрунтаванасці пазбаўлення яе мужа доўгатэрміновага спаткання і прыняць меры да начальніка калоніі, каб спыніць адвольнае накладанне спагнанняў на Пятра Кучуру.
Адказ жанчына атрымала за подпісам таго самага намеснік начальніка Івана Мысліцкага, які раней праводзіў праверку і зачыніў вочы на парушэнні з боку адміністрацыі калоніі. Ён напісаў, што віна Пятра Кучура «пацвярджаецца сабранымі матэрыяламі, абвешчанае спагнанне ў выглядзе пазбаўлення чарговага працяглага спаткання адпавядае цяжкасці і характару парушэння, а парушэнняў з боку супрацоўнікаў папраўчай установы не выяўлена». Таксама І. Мысліцкі ўказаў, што канфіскаваныя лісты ў адрас Людмілы Кучура насілі цынічны характар і ўтрымлівалі жаргонныя словы, а па пытанні прадузятага стаўлення з боку адміністрацыі ПК-15 да асуджанага Кучуры супрацоўнікамі Дэпартамента неаднаразова праводзіліся праверкі, пра што ёй накіроўваліся нібыта матываваныя адказы.
Ён сцвярджае, што Людміла Кучура не прыводзіць дадатковых фактаў, якія маюць значэнне для разгляду скаргі па сутнасці, і ў выпадку паступлення ў Дэпартамент зваротаў аналагічнага зместу ў будучыні яны будуць пакінутыя без разгляду.
Людміла Міхайлаўна адзначае, што на 23 і 25 снежня былі запланаваныя тэлефонныя размовы з мужам, аднак, на сувязь ён так і не выйшаў.
«Я ўпэўнена, што цяпер ён знаходзіцца ў ШІЗА з падачы самога Дэпартамента», - кажа яна.
Зараз жонка асуджанага звярнулася з заявай аб азнаямленні з матэрыяламі праведзенай праверкі па яе скарзе, аднак, асаблівых надзей яна не ўскладае:
«Як правіла, пры азнаямленні з матэрыяламі мне паказваюць толькі маю скаргу і адказ на яе, усё астатняе нібыта для службовага карыстання. Але чаму не пакажуць акт аб накладанні спагнання на мужа, калі ён сапраўды вінаваты?
Я лічу, што ўтойванне інфармацыі як раз пацвярджае тое, што адміністрацыя калоніі пакрывае неправамерныя дзеянні сваіх супрацоўнікаў у дачыненні да зняволеных. Для іх заўсёды вінаваты асуджаны».
Нагадаем, надзвычайная сітуацыя склалася вакол Пятра Кучуры пасля стварэння яго жонкай петыцыі за перадачу паўнамоцтваў Дэпартамента выканання пакаранняў Міністэрству юстыцыі. Асаблівую занепакоенасць у адміністрацыі калоніі выклікала тое, што такім чынам раскрылася інфармацыя пра катаванні і неаказанні медыцынскай дапамогі ў калоніі, якія прывялі да некалькіх смерцяў, у тым ліку і жонкі аднаго з асуджаных падчас працяглага спаткання.
Крыніца: Пераднавагодні «падарунак» ад ПК-15: Пятра Кучуру пазбавілі спаткання з жонкай