Жыхару Мазыра Васілю Васько 14 сакавіка ў мясцовай міліцыі ўручылі адміністрацыйны пратакол па артыкуле 21.14 КаАП (парушэнне парадку добраўпарадкавання населеных пунктаў). 8 студзеня ён размясціў на стэле, усталяванай у памяць аб ракетнай дывізіі, надпіс «Незалежнасцю ня гандлюем!».
Стэла была ўсталяваная ў Мазыры ў памяць ракетчыкаў, якія дыслакаваліся тут у савецкі час. На памятным знаку колеру расейскага трыкалора размешчаны савецкі сцяг, малюнак ракетнага комплексу, георгіеўская стужачка і надпіс «Ракетныя войскі стратэгічнага прызначэння - гарант сьвету і бяспекі».
З гэтай нагоды неадкладна адгукнуўся сайт раённай газеты "Жыццё Палесся".
«Зламыснік пакуль яшчэ не затрыманы, але рэальнасць такая, што за зробленае яму рана ці позна давядзецца трымаць адказ па ўсёй строгасці закона. Бо, як сцвярджае народная мудрасць, няма нічога тайнага, каб не стала відавочным. Злачынства, прадугледжанае арт. 341 КК Рэспублікі Беларусь, выяўляецца ў апаганенні будынкаў і збудаванняў цынічнымі надпісамі або малюнкамі, пашкоджанні маёмасьці на грамадскім транспарце або ў іншых грамадскіх месцах пры адсутнасці прыкмет больш цяжкага злачынства», - выносіць журналіст свой прысуд 24 студзеня.
Васіль Васько растлумачыў БелаПАН, што сапраўды пакінуў надпіс «незалежнасьць ня гандлюем» на памятным знаку, так як ён выступае «супраць вайны, расійскай агрэсіі, мілітарызацыі і за незалежнасьць Беларусі".
«Я напісаў гэта ў студзені, як раз калі ў СМІ ўсё часцей гучала інфармацыя пра магчымую анэксію Беларусі, зліцці яе з Расіяй. Палічыў, што георгіеўская стужачка на стэле і надпісы аб «гаранта міру і бяспекі» недарэчныя ў беларускім горадзе», - заўважыў Васько.
21 лютага яго з дому даставілі ў міліцыю, дзе канфіскавалі тэлефон і праверылі яго змесціва. Там былі знойдзены фатаграфіі з надпісам на стэле. «Мне пагражалі, што пасадзяць, я прызнаўся, што сапраўды пакінуў гэты надпіс», - дадаў жыхар Мазыра.
Тэлефон у яго забралі, але пасля скаргі ў пракуратуру вярнулі.
У сувязі з адміністрацыйнай справай у міліцыю выклікалі і актывіста Беларускага нацыянальнага кангрэса (БНК) Уладзіміра Неўмяржыцкага.
«Мне ў міліцыі заявілі, што гэта я арганізаваў нанясенне графіці на стэлу. Прычым, не толькі арганізаваў, але і заплаціў выканаўцу. Свае прэтэнзіі міліцыя грунтавала на тым, што Васіль Васько дасылаў мне фатаграфію стэлы ў Телеграм-канале. Я адмовіўся сведчыць супраць себя», - паведаміў Неўмяржыцкі.
Па словах Васько, 14 сакавіка ў міліцыі ў яго пыталіся, хто яго «падгаварыў пакінуць такую надпіс». «Я сам вырашыў напісаць так на стэле», - заўважыў Васько.
У савецкі час у Мазыры дыслакавалася 33-і гвардзейская ракетная дывізія. У 90-х яна была перамешчаная на тэрыторыю Расійскай Федэрацыі. Некаторыя былыя ракетчыкі засталіся жыць у Мазыры.
Крыніца: Мазыр: Пратакол за графіці «Незалежнасцю ня гандлюем» і рэакцыя мясцовай раёнкі