Гуліко Махнадзэ тры дні правяла ў ізалятары на Акрэсціна. Дзяўчыну затрымалі а 20-й гадзіне 7 красавіка, калі яна вярталася з працы і напаткала сталічных ашуканцаў, што збіраюць грошы, удаючы, што трапілі ў бяду. Замест таго, каб схапіць папрашаек, міліцыянты забралі ў пастарунак дзяўчыну. Пра тое, што адбывалася ўвечары сёмага красавіка і наступныя тры дні дзяўчына распавяла тэлеканалу “Белсат”.
«Я выявіла п’яных папрашаек і выклікала міліцыю. Аднак замест праваахоўнікаў прыехалі жаўнеры з вайсковай часткі 5448. Гэта вайсковая частка пры МУС, у якой салдаты тэрміновага набору працуюць як патрульна-паставая служба».
Адзін з міліцыянтаў сказаў, што я «спайсы торкаю». Акрамя мяне яшчэ траіх узялі – двое пʼяных, адзін цвярозы жабрак. Жанчын-жабрачак пʼяных адпусцілі. А тыя, якіх забралі, лаяліся – яны не рабілі ім заўвагаў».
У РУУС Цэнтральнага раёну Менску на дзяўчыну склалі пратакол за дробнае хуліганства, а таксама папрасілі напісаць заяву жабракоў.
«Мне адкрытым тэкстам сказалі, што я дастала іх сваім актывізмам і скаргамі. Па прыездзе ў аддзяленне міліцыі яны спыталі, у каго з затрыманых мужчынаў мінская прапіска, і прапанавалі яму засведчыць, што я лаялася на яго матам. Ён быў нецвярозы і сказаў ім, што хадзіў у царкву ставіць зніч за сваякоў, а я на яго накінулася.
Адзін з участковых хацеў мяне адпусціць, але начальнік РУУС сказаў: не, хай пасядзіць. І папрасіў патрымаць мяне ў ізалятары часовага ўтрымання да серады. Мне не далі напісаць скаргу, адразу закрылі. Фатаграфавалі мяне ў базу а другой ночы, як рэцыдывістку. Спачатку склалі пратакол, а пасля апыталі».
Гуліко звяртае ўвагу на хамскае стаўленне міліцыянтаў і няспынныя спробы яе абразіць. Піць дзяўчыне давалі двойчы на дзень, часта ўсяго паўкубка.
«На дзвярах камер віселі правы і абавязкі. Было напісана, што да затрыманых трэба ставіцца гуманна. Аднак на справе гэта выглядала так:
– Скажыце, калі ласка, каторая гадзіна?
– Па сонцы арыентуйцеся.
– Калі нас выведуць на шпацыр?
– Вы *** смактаць захацелі?
– Чаму вы звяртаецеся да мяне на «ты»?
– Ляжкі ў Машкі».
Тры дні актывістка правяла на Акрэсціна. Тэлефон у яе забралі. Дзяўчына не паспела нікому паведаміць, што з ёй адбываецца. Яна прапусціла тры працоўныя дні, а ў замкнёнай кватэры засталася котка, якая магла памерці праз адсутнасць вады і ежы.
"Мая котка з галадухі ела яблык і герань. Усе ў ізалятары дзівіліся, што за брыдкаслоўе мяне столькі трымаюць. Я паспела змяніць чатыры камеры. І з дэпартаванымі сядзела, і з алкаголікамі, з іншымі парушальнікамі".
Праз тое сутак затрымання адбыўся суд, але справу адправілі на дапрацоўку.
"У суд мяне везлі ў кайданках. На судзе 10 красавіка нас было пяцёра. Трэба было пагадзіцца з пратаколам, яны выпісвалі штраф і адпускалі, але я не згаджалася. Мяне пакінулі на самы канец, а пасля суддзя (Юлія Густыр) сказала, што адсылае справу на дапрацоўванне".
Пасля таго як суддзя адпусціла дзяўчыну, міліцыянт з РУУС Цэнтральнага раёну зноў хацеў яе затрымаць, але Гуліко ўдалося вырвацца.
«Я сказала, што 72 гадзіны мінулі і пабегла хутчэй. На дзвярах кватэры ўчастковы пакінуў цыдулку са сваім тэлефонам. Але гэта не позва, я не збіраюся нікуды ісці і справы гэтай не пакіну. Паглядзім, што будзе далей».
Дзяўчына займаецца выкрыццём несапраўдных жабракоў з 2017 года. Свайго сапраўднага імя Гуліко не раскрывае з меркаванняў бяспекі. Яна кажа, што лічыць змаганне са сталічнымі махлярамі сваім грамадзянскім абавязкам. Усе відэа яна выкладае на сваім канале ў «YouTube».
Крыніца: «Адкрытым тэкстам сказалі, што я іх дастала». Міліцыя помсціць выкрывальніцы шарлатанаў