Паводле інфармацыі, якую 28 жніўня атрымала жонка Мікалая Статкевіча Марына Адамовіч у судзе Маскоўскага раёна Мінска, апазіцыйны палітык быў арыштаваны на пяць сутак за ўдзел у несанкцыянаваным сходзе 30 сакавіка. Пастанова аб адміністрацыйным арышце была вынесена 15 траўня і ўступіла ў сілу 23 траўня. Пры гэтым Мікалаю Статкевічу ніхто не паведамляў ні пра заведзеную справу, ні пра рашэнне суда, пра які ён таксама не ведаў.
Са слоў Марыны Адамовіч, 30 сакавіка Мікалай Статкевіч на выхадзе з ЦІП сустракаў паплечнікаў, якія адбывалі суткі арышту пасля Дня волі. І разгорнуты ім бел-чырвона-белы сцяг, хутчэй за ўсё, стаў прычынай таго, што праваахоўныя органы расцанілі гэта як несанкцыянаваны сход.
“Застаецца толькі здагадвацца, што будзе пасля гэтых пяці сутак. Магчыма, Міколу адпусцяць, дадуць некалькі дзён пабыць на волі, а перад 8 верасня зноў затрымаюць ужо на 15 сутак, да якіх ён прысуджаны за акцыю 3 ліпеня. Але можа і ўвогуле яго не будуць выпускаць з ЦІП”, - разважае жонка Мікалая Статкевіча.
Сама Марына Адамовіч, таксама патрапіўшая пад пераслед, зараз абскарджвае дзеянні суда Савецкага раёну Мінска, які належным чынам не паведаміў пра вядзенне ў дачыненні да яе адміністрацыйнага працэсу.
“У мяне за гэтыя поўгады тры сацыяльныя акцыі скончыліся вялікімі штрафамі, якія на сённяшні дзень ужо нашмат перавышаюць мае даходы. То бок, на думку нашых уладаў, мы павінны шчодра сплачваць ёй за сваё жаданне жыць у дэмакратычнай і прававой дзяржаве. Напрыклад, за 25 сакавіка мяне асудзілі, не выдаўшы напярэдадні пратакол аб адміністрацыйным правапарушэнні, увогуле не паведаміўшы пра тое, што будзе суд, і нават не даслаўшы мне судовае рашэнне. Затое судовыя выканаўцы спраўна выконваюць сваю справу. Паколькі падчас тых судоў мелі месца ўсе магчымыя парушэнні дзейснага заканадаўства, я зараз іх актыўна аспрэчваю. Але, нажаль, тэндэнцыі аднолькавыя - жорсткімі метадамі і, найперш, рублём на сённяшні дзень улады імкнуцца перадухіліць восеньскія сацыяльныя выступленні. А тое, што людзі даспелі да іх, мне здаецца, гэта бачна”, - дзеліцца думкамі Марына Адамовіч.
Марына Адамовіч лічыць, што зараз ўлады адчуваюць новае выспяванне сацыяльнай актыўнасці насельніцтва, а таму будуць і далей дзейнічаць вядомымі, адпрацаванымі гадамі спосабамі.
“У гэтым годзе разам з актывізацыяй вясновых сацыяльных пратэстаў актывізаваліся і высілкі ўладаў, каб іх пагасіць. І гасяць яны іх звыклымі спосабамі, развязваннем, па вялікамі рахунку, тэрору супраць уласнага насельніцтва і, па маім меркаванні, сапраўдным рабаваннем актыўных людзей. Вось гэтае “брацанне зброяй” прызванае перадухіліць новую хвалю грамадзянскай актыўнасці, якая можа ўзнікнуць восенню. Але ж у дзяржавы няма грошаў, і таму уладам даводзіцца стаяць на двух берагах адной ракі. Але ці атрымаецца ўстаяць? Я не ведаю”.
Нагадаем, што Мікалай Статкевіч быў арыштаваны апоўдні 26 жніўня і дастаўлены ў Цэнтр ізаляцыі правапарушальнікаў ГУУС Мінгарвыканкама. Яго жонцы Марыне Адамовіч спатрэбілася некалькі дзён, каб даведацца падставы арышту палітыка.