На тэрыторыі палігону «Лосьвіда», што разьмешчаны ў 13-ці кілямэтрах ад Віцебску, штодня праходзяць баявыя стрэльбы, пускі ракет, падрыўныя работы, кіраваньне баявымі машынамі і іншыя небясьпечныя для жыцьця і здароўя чалавека мерапрыемствы баявой падрыхтоўкі войскаў. Вайскоўцы папярэджваюць: у выніку правядзеньня стрэльбаў, а таксама вучэньняў у месцах іх правядзеньня могуць заставацца неразарваныя боепрыпасы, якія, знаходзячыся ў зямлі ці ў густой траве, ня бачныя і ўяўляюць сьмяротную небясьпеку.

Вайсковыя вучэньні яшчэ не пачаліся, але ўжо выклікалі пратэставыя настроі сярод жыхароў розных куткоў краіны. Ня стаў выключэньнем і Віцебскі раён, дзе невядомыя прымацавалі некалькі расьцяжак антываеннага зьместу: «Рускі салдат, ідзі дамоў!!!» Надпісы адмыслова зробленыя па-расейску.