Па словах старшыні абласной арганізацыі Беларускага Чырвонага Крыжа Галіны Жаланавай, мігрантам (гэта пераважна бежанцы з Украіны) патрэбна дапамога ў жыллёвым пытанні, а канкрэтна: у пошуку жылля і штомесячнай аплаце за яго. Але калі раней выплаты рабіліся па лініі Упраўлення Вярхоўнага камісара ААН па справах бежанцаў у Беларусі праз абласную арганізацыю Чырвонага Крыжа, то апошнія два гады яны не ажыццяўляюцца. Галіна Жаланава падкрэсліла, што ўскладняе сітуацыю і тое, што не завершана будаўніцтва крызіснага цэнтра пад эгідай арганізацыі, дзякуючы якому ўдавалася здымаць самыя вострыя пытанні з жыллём для бежанцаў і мігрантаў. Віцебскі аблвыканкам у сувязі з гэтым звярнуўся ў МЗС рэспублікі з хадайніцтвам аб садзейнічанні ў гэтым пытанні зацікаўленых міжнародных арганізацый і, у прыватнасці, Упраўлення Вярхоўнага камісара ААН па справах бежанцаў.

 З крызісным цэнтрам - сітуацыя  дзіўная: у 2022 годзе СМІ ўрачыста паведамлялі аб адкрыцці ў Віцебску гэтай установы па вул. Лазо, 4. Пра яго пісалі наступнае: ”У крызісным цэнтры змогуць адначасова пражываць да 20 чалавек. На базе цэнтра абсталяваны 3 жылыя пакоі, пакой адпачынку і гульнявы ​​пакой для дзяцей, а таксама пакоі для правядзення індывідуальных і групавых сустрэч з псіхолагам. Плануецца, што часовае размяшчэнне будзе давацца тэрмінам да 2 месяцаў.

 Людзі, якія знайшлі прытулак у крызісным цэнтры, таксама будуць забяспечаны гарачым харчаваннем і пры неабходнасці змогуць звярнуцца да спецыялістаў па псіхалагічную, юрыдычную або сацыяльную дапамогу”.

 Цяпер жа высвятляецца, што вядзецца яшчэ нейкае будаўніцтва, пра якое мала што вядома.

 Прадстаўнік Упраўлення Вярхоўнага камісара ААН па справах бежанцаў у Беларусі Эрол Ардуч падзяліўся новымі планамі, накіраванымі на супрацоўніцтва з дзяржаўнымі органамі і грамадскімі арганізацыямі Віцебскай вобласці. У прыватнасці, расказаў аб намеры стварыць аб'яднаны офіс, які будзе працаваць па прынцыпе "аднаго акна".Туды змогуць звярнуцца вымушаныя мігранты, якія не могуць вырашыць свае праблемы без пасрэдніцтва міжнародных арганізацый.

Маргарыта Пятрова