Таццяне Пыцько прад“яўлена абвінавачанне паводле 361-1 КК РБ («стварэнне экстрэмісцкага фарміравання або ўдзел у ім». Есць падставы меркаваць, што вядзецца менавіта пра ўдзел: пасля затрымання Вячаслава Лазарава ў следчых апынуўся ягоны відэаархіў, дзе на відэазапісах прысутнічае Таццяна Пыцько. Тых, каго ўдалося ідэнтыфікаваць па здымках, пачалі выклікаць на допыты ў СК і распытваць пра ролю жонкі ў аператарскай працы яе мужа.

У сакавіку гэтага году беларуская праваабарончая супольнасць прызнала Вячаслава Лазарава палітвязнем. 21 чэрвеня праваабаронцы прызналі палітычнай зняволенай і ягоную жонку Таццяну Пыцько. У адпаведнай заяве гаворыцца: «МУС і КДБ у пазасудовым парадку адвольна прызнаюць экстрэмісцкімі групы грамадзян, якія аб'яднаныя грамадскімі ці палітычнымі інтарэсамі, крытыкуюць дзеянні ўладаў і патрабуюць зменаў у дзяржаве і палітыцы, што яна праводзіць, таксама экстрэмісцкімі фармаваннямі прызнаныя некаторыя СМІ. Гэта, у сваю чаргу, прыводзіць да адвольнага прыцягнення да крымінальнай адказнасці і пазбаўлення волі іх удзельнікаў і рэспандэнтаў у якасці непрапарцыйнай меры абмежавання права на асацыяцыю і свабоды выказвання меркаванняў».

Таццяна Пыцько трапіла ў поле зроку сілавікоў падчас мірных маршаў пратэсту ў верасні 2020г. Яе двойчы штрафавалі «за ўдзел у несанкцыянаваных масавых мерапрыемствах». У выніку жанчына страціла працу: была вымушана сысці са школы ў аграгардку Акцябрскі, дзе выкладала рускую мову і літаратуру. У сакавіку 2022г. яна пабралася з Вячаславам Лазаравым, і апошнім часам займалася выключна выхаваннем дзяцей – наймалодшай Евы Лазаравай і старэйшых сына і дачкі ад першага шлюбу.

Таццяна Віктарава