Падчас збору подпісаў за вылучэнне ўдзельнікаў мінулай прэзідэнцкай выбарчай кампаніі людзі пакідалі свае пашпартныя дадзеныя, па якіх іх цяпер расшукваюць.

Для адміністрацый прадпрыемстваў распараджэнні на звальненне работнікаў дадаюць праблемаў: міністэрствы патрабуюць выканання запланаваных аб’емаў працы, але здзейсніць гэта замінаюць «цякучка», якая набірае абароты, і дэфіцыт кваліфікаваных кадраў.

Масавыя звальненні за падтрымку Віктара Бабарыкі ў 2020-м годзе распачаліся больш як праз два гады пасля завяршэння электаральнай кампаніі. Прэтэндэнт на ўдзел у выбарах Віктар Бабарыка быў затрыманы 18 чэрвеня 2020 г. разам з сынам Эдуардам, калі накіроўваўся ў ЦВК для здачы сабраных подпісаў. Затрыманне праводзіў Дэпартамент фінансавых расследаванняў Камітэта дзяржкантролю.

У судзе Маскоўскага раёнy Мінска 6 ліпеня 2021 г. банкір і грамадскі дзеяч, прэтэндэнт у кандыдаты на пасаду прэзідэнта Віктар Бабарыка быў прызнаны вінаватым паводле арт. 235 Крымінальнага кодэксy – Легалізацыя («адмыванне») сродкаў, атрыманых злачынным шляхам, і арт. 430 Крымінальнага кодэксy – Атрыманне хабару. Свае віны не прызнаў. Суддзя Вярхоўнага суда Ігар Любавіцкі пакараў яго 14 гадамі калоніі ва ўмовах узмоцненага рэжыму.

Віктар Бабарыка адбывае пакаранне ў Наваполацкай ПК1. У траўні 2022 г. Камітэт ААН зарэгістраваў скаргу ад імя Віктара Бабарыкі. У звароце юрысты просяць прызнаць парушэнні правоў палітзняволенага (як мінімум 11), а таксама абавязкі дзяржавы вызваліць яго і ліквідаваць наступствы неправамернага асуджэння.

Таццяна Віктарава