Аднапартыец Мікалая Статкевіча, віцебскі сацыял-дэмакрат Аляксей Гаўруцікаў асабіста схадзіў у Парк імя 30-годзьдзя ВЛКСМ, дзе раённымі ўладамі была забароненая акцыя 25 сакавіка: «Нам сказалі, што якраз 25 сакавіка ў гэтым парку заплянаваныя спартовыя спаборніцтвы. Але ніводнага спартоўца ў Дзень Волі я там не сустрэў. Калі пацікавіўся, што здарылася, то ў адміністрацыі спартовага комплексу “Камсамолец” сказалі: “Спаборніцтвы адмянілі”. Як высьветлілася, ужо пасьля таго, як нам адмовілі з прычыны “заятасьці” парку, але яшчэ за тры дні да замоўленага намі мерапрыемства, а менавіта 22 сакавіка, аддзел культуры, спорту і турызму адмяніў спаборніцтвы” ў сувязі са складанымі ўмовамі надвор’я і вырубкай дрэваў у парку”. Але да нас так ніхто і не зьвярнуўся, хаця галоўная падстава для адмовы “адмянілася”».

Аляксей Гаўруцікаў і другі заяўнік масавай акцыі на Дзень Волі, кіраўнік абласной структуры руху «За свабоду» Хрыстафор Жаляпаў маюць падставы меркаваць, што раённыя чыноўнікі былі зь імі не зусім шчырыя, калі прымалі рашэньне пра адмову: «Таму, каб болей не паўтараліся гэткія сытуацыі, і ў нас не было падставаў падазраваць работнікаў раённай адміністрацыі ў розных хітрыках, мы просім Віцебскі гарвыканкам пазнаёміць нас з зацьверджаным плянам мерапрыемстваў у Парку імя 30-годзьдзя ВЛКСМ. Лічым, што наша просьба мусіць быць задаволеная, бо гэтае месца – афіцыйна вызначаная тэрыторыя для правядзеньня масавых мерапрыемстваў», – гаворыць Хрыстафор Жаляпаў.

Крыніца: Праваабарончы цэнтар "Вясна"