Аўторак, 30 Сакавік 2021

35 сутак на траіх. Суд пакараў арыштам віцяблян, затрыманых на Дзень волі

Ацаніць гэты матэрыял
(1 голас)
Алесь Вендт, Іван Казлоў, Кастусь Смолікаў Алесь Вендт, Іван Казлоў, Кастусь Смолікаў

У судзе Кастрычніцкага раёну Віцебску 30 сакавіка прайшоў судовы працэс у дачыненні да трох віцяблян, затрыманых на Дзень волі ля помніку князю Альгерду. Іх вінавацілі ва ўдзеле ў несанкцыянаваным пікетаванні (арт. 24.23 КаАП). Суд пакараў мужчын адміністрацыйнымі арыштамі – агулам на 35 сутак.

Кіраўнік Віцебскай абласной філіі БНФ Кастусь Смолікаў і віцябляне Алесь Вендт і Іван Казлоў былі затрыманыя 25 сакавіка, а потым змешчаныя ў ізалятар часовага ўтрымання на 72 гадзіны. Іх вызвалілі ў нядзелю 28 сакавіка. Праз дзень адбыўся суд. Справу разглядаў суддзя Уладзімір Царыкаў.

«25 сакавіка з бела-чырвоным шалікам з надпісам «Жыве Беларусь! Беларусь за Мілінкевіча!» ўзяў удзел у пікетаванні: на знак абвяшчэння незалежнасці БНР знаходзіўся каля помніку Вялікаму князю ВКЛ Альгерду разам з Казловым і Смолікавым», – напісалі міліцыянты ў пратаколе Алеся Вендта.

У дачыненні да іншых удзельнікаў працэсу пратаколы ўтрымлівалі такія ж фармулёўкі, але ўдакладнялася, што шалік быў не ў iх.

Як патлумачыў на судзе Алесь Вендт, ён хацеў сустрэцца ў цэнтры з Кастусём Смолікавым і пайсці ў кавярню, каб пагутарыць і адзначыць свята.

«Мы хацелі паразмаўляць, прысесці на лаўку каля Альгерда. Прыпынак быў поўны, і там няма дзе было прысесці», – сказаў Алесь.

Каля прыпынку ж ён выпадкова сустрэў свайго знаёмага Івана Казлова, які проста падышоў павітацца – і быў затрыманы «прычэпам».

Як вынікае з рапарту, складзенага супрацоўнікам МУС Віталём Пралічам, «паводле інфармацыі неўстаноўленай асобы, было ўстаноўлена, што каля помніку Альгерду знаходзіцца група грамадзян, якія маюць пры сабе шалік бела-чырвонага колеру, а таксама палотнішча бел-чырвона-белага колеру. У ходзе выбыцця нараду ППС былі ўстаноўленыя і затрыманыя Вендт, Казлоў, Смолікаў».

Пры аглядзе асабістых рэчаў у Алеся Вендта сапраўды быў знойдзены БЧБ-сцяг, які ляжаў у падарункавы пакеце. Па словах Алеся, і гэта пацвярджае відэазапіс, прагледжаны ў судзе, сцяг з пакету не даставаўся.

Якім чынам «неўстаноўленая асоба» ведала пра знаходжанне ў пакеце сцяга, засталося загадкай.

Сам жа Віталь Праліч на суд не з'явіўся, хаця суддзя на пачатку працэсу казаў пра заяўленых сведкаў-міліцыянтаў.

«Калі б мы хацелі правесці масавае мерапрыемства, мы б яго правялі. І ў прынцыпе, нічога нам не замінала яго правесці. Але насамрэч мы з сябрам хацелі проста папіць кавы ці піва і каля Альгерда вырашалі, куды лепш пайсці», – сказаў Кастусь Смолікаў.

Суддзя Уладзімір Царыкаў прызнаў мужчын вінаватымі ва ўдзеле ў несанкцыянаваным пікетаванні (арт. 24.23 КаАП). Кіраўнік абласной філіі БНФ Кастусь Смолікаў асуджаны на 12 сутак, Алесь Вендт – на 13, а Іван Казлоў – на 10 сутак адміністрацыйнага

арышту.

Рашэнне суду не набыло законнай моцы. Суддзя даў віцяблянам 5 сутак на абскарджанне пастановы. Пасля суду іх не затрымалі.

Уладзімір Бяляўскі