Гэтым самым, як мяркуе Мікулін, спадар Волкаў парушыў, па-першае, артыкул 8 Закону “Аб статусе дэпутата мясцовага Савету”, якая прадпісвае “мець з сабой службовае пасьведчаньне і нагрудны знак дэпутата і карыстацца імі на працягу тэрміну сваіх паўнамоцтваў”. Па-другое, парушыў Палажэньне “Аб нагрудным знаку дэпутата мясцовага Савету”. Па-трэцяе, – рэглямэнт Віцебскага абласнога Савету.
“Утойваць пад любой матывацыяй сваю прыналежнасьць да дэпутацкага корпусу падчас выбарчай кампаніі ў вышэйшы заканадаўчы ворган краіны і тым самым уводзіць у зман выбарцаў акругі, зьяўляецца грубым парушэньнем выбарчага заканадаўства Рэспублікі Беларусь”, – лічыць Аляксандар Мікулін і прапануе зьняць зь перадвыбарчай гонкі свайго канкурэнта.
Яшчэ адна заява за подпісам даверанай асобы Мікуліна Лідзіі Сагідулінай была накіраваная ў акруговую выбарчую камісію Віцебскай-Чкалаўскай выбарчай акругі. Сагідуліна просіць даць пісьмовы адказ на некалькі пытаньняў. У прыватнасьці, чые фотаздымкі знаходзяцца над слёганам “Выбіраем Волкава!” на ягоным агітацыйным плякаце, і чаму пад партрэтамі грамадзян не падаюцца іхныя прозьвішчы.
Сагідуліна зьвярнула таксама ўвагу на тое, што для кандыдата Волкава ў памяшканьні акруговай камісіі выдзелены асобны стэнд. На яе думку, гэта парушае выбарчае заканадаўства, бо ставіць кандыдатаў у няроўныя ўмовы. Вядомы ў Віцебску матэматык Міхаіл Волкаў лічыцца кандыдатам ад улады. Мікуліна ж падтрымлівае кампанія “Гавары праўду!”