Кіраўнік абласной структуры руху “За cвабоду” Хрыстафор Жаляпаў зьвярнуўся ў МУС, калі атрымаў ад віцебскіх міліцыянтаў чарговую адмову на абслугоўваньне масавай акцыі. Паводле адпаведнага рашэньня гарвыканкаму, дазвол на акцыі можна атрымаць, толькі маючы такія дамовы: “Нам напісалі зь міліцэйскай управы, што дамову заключаць толькі пасьля таго, як мы атрымаем дазвол зь Першамайскай раённай адміністрацыі. А ў раённай адміністрацыі патрабуюць дамову ад пачатку”.

Актывісты БХД і Партыі БНФ затрыманыя ў Віцебску каля будынку суду Кастрычніцкага раёну, дзе праходзіў працэс над актывістамі Партыі БНФ Кастусём Смолікавым і Леанідам Аўтуховым. Як паведаміла каардынатарка БХД Тацьцяна Севярынец, актывісты спачатку прыйшлі ў Парк чыгуначнікаў, дзе зьбіраліся правесьці мерапрыемства да Дня Волі. Калі даведаліся, што ў гэты момант у судзе Кастрычніцкага раёну праходзіць суд над актывістамі Кастусём Смолікавым і Леанідам Аўтуховым, то вырашылі падтрымаць іх.

У Віцебску затрыманыя сябры партыі БНФ — цяперашні старшыня абласной арганізацыі Леанід Аўтухоў і былы кіраўнік гэтай структуры Кастусь Смолікаў. У гандлёвым цэнтры «Эвіком» яны раздавалі ўлёткі з запрашэньнем на мітынг 25 сакавіка. Цяпер актывісты знаходзяцца ў ізалятары часовага ўтрыманьня, суд над імі адбудзецца 25 сакавіка.

Чарговым месцам правядзеньня маратону “Хваля салідарнасьці” стала мястэчка Гарадок Віцебскай вобласьці. Тут мясцовыя актывісты “Беларускай хрысьціянскай дэмакратыі” разам зь іншымі неабыякавымі людзьмі напісалі лісты палітвязьням. Мяркуецца, што маратон “Хваля салідарнасьці” пройдзе па 37 гарадох Беларусі і скончыцца акцыяй у Дзень Волі ў Менску.