Згодна з афіцыйнай інфармацыяй на сайце Віцебскага гарвыканкама, віцяблянін, «з'яўляючыся карыстальнікам месэнджара "Telegram", быў падпісаны на розныя экстрэмісцкія і дэструктыўныя публічныя групы. У некаторых з іх пакідаў свае каментарыі. У ліку іншых пакінуў абразлівыя каментарыі адносна Кіраўніка дзяржавы і намесніка Міністра ўнутраных спраў. У судовым паседжанні абвінавачаны сваю віну прызнаў цалкам. Прычыны сваіх учынкаў патлумачыў негатыўнымі эмоцыямі пасля прачытання каментароў іншых карыстальнікаў. Разумеў, што з апублікаванымі ім абразамі азнаёмілася неабмежаваную колькасць карыстальнікаў месэнджэра, аднак не надаў гэтаму значэння і не задумваўся аб адказнасці».

Суддзя суда Першамайскага раёна Віцебска Дзяніс Аляксеенка сёлета ў верасні асудзіў Паўла Іванова да пазбаўлення волі на тэрмін 2 гады з адбываннем пакарання ў папраўчай калоніі ва ўмовах агульнага рэжыму і да штрафу памерам 4 000 рублёў.

Падрабязныя звесткі пра прысуд было апублікаваны толькі 24 снежня. Гэта здарылася праз месяц пасля таго, як прозвішча і імя асуджанага ўнеслі ў пералік асобаў, «схільных да экстрэмісцкай дзейнасці» на сайце МУС.

«Аўтарытэт кіраўніка дзяржавы, дзейнасць прадстаўнікоў улады і ўсіх службовых асоб дзяржавы ў цэлым - адзін з важнейшых фактараў стабілізацыі грамадства. Грамадская небяспека злачынстваў супраць парадку кіравання заключаецца ў тым, што любое з іх не толькі падрывае аўтарытэт дзяржаўнай улады, але і парушае нармальную дзейнасць органаў кіравання, перашкаджае іх рабоце, прыводзіць да дэзарганізацыі адносін кіравання», -- сцвярджае прадстаўніцтва Віцебскай гарадской пракуратуры.

Ігар Лупнікаў