Сабраныя з прыватных архіваў фотаздымкі зьяўляюцца сьведчаньнем нязломнасьці духу і дэмакратычных перакананьняў асобнага чалавека. Паказваюць Барыса Ханонавіча ў штодзённым публічным супрацьстаяньні аўтарытарнай сыстэме і грамадзкаму канфармізму на працягу двух дзесяцігодзьдзяў. Гэткая адданасьць ідэі ня можа ня ўражваць, ня можа не натхняць. Натхніла яна на арганізацыю выставы і віцебскіх журналістаў ды фатографаў.

У 1991 годзе спадар Хамайда стаў рэдактарам аднаго зь першых незалежных выданьняў на Беларусі. Газэта «Выбар» мела сваё адметнае аблічча і вылучалася сярод іншых выразнай нацыянальна-дэмакратычнай пазыцыяй, заклікала народ да«пабудовы сапраўднай дэмакратычнай і прававой дзяржавы». Наклад выданьня даходзіў да 2500 асобнікаў.

У 1994 годзе Міністэрствам інфармацыі на фармальнай падставе было ануляванае пасьведчаньне аб рэгістрацыі, пасьля чаго газэта пачала выходзіць падпольна і зь меншай пэрыядычнасьцю. Апошні нумар  быў надрукаваны ў 2005 годзе.

Але найперш сёньняшнія месьцічы зьвязваюць няўрымсьлівую асобу Барыса Ханонавіча зь ягоным штодзённым стаяньнем ля «сіняга дому». Менавіта ў гэтым месцы і зроблена нямала здымкаў, якія будуць выстаўляцца.

Экспазыцыя выставы будзе складацца зь дзьвюх частак: адна зь іх стане  адлюстраваньнем мінуўшчыны, другая – сучаснасьці. Акрамя архіўных фотаздымкаў у наведнікаў  будзе магчымасьць пабачыць і нумары некалі папулярнай сярод дэмакратычнай супольнасьці газэты «Выбар».

Мяркуецца, што выстава стане перасоўнай, і пазнаёміцца зь ёй змогуць зацікаўленыя асобы з найбліжэйшых да Віцебску раённых цэнтраў і паселішчаў.

Крыніца: Дыялёг Online газэта