Намеснік старшыні Віцебскага аблвыканкама Анжаліка Нікіціна паведаміла СМІ аб тым, што ў цяперашняй сітуацыі прамысловы комплекс найбольш пацярпеў ад санкцыйнага ціску. У цэлым па годзе ўладамі ацэньваецца недабор выручкі па прамысловасці каля 1 мільярда рублёў. Але на гэтым кепскія навіны аб стане рэгіянальнай эканомікі не скончыліся.

Мясцовыя міліцыянты атрымалі распараджэнне звяртаць увагу на расейскія нумары аўтамашын на паркоўках і ўсталяваць кантакты з тымі, хто здае кватэры «на суткі», а таксама правяраць дакументы ў грамадзян прызыўнога ўзросту, якія па тых ці іншых прыкметах падаюцца падобнымі да ўцекачоў з-за ўсходняй мяжы. Новыя абавязкі на беларускіх сілавікоў усклалі пасля таго, як прэзідэнт Расеі Уладзімір Пуцін абвесціў аб правядзенні мабілізацыі 21 верасня, і жыхары Расейскай Федэрацыі масава пачалі ўцякаць за межы сваёй краіны.

Дзяржаўнае прадпрыемства "Эксперыментальная база "Тулава" з 17 жніўня знаходзіцца ў стане ліквідацыі. Яно мае 2 млн. рублёў доўгу, ёсць запазычанасці выплат у бюджэт і ў пенсіённы фонд. Але ліквідацыя сельгаспрадпрыемства адкрывае перад уладамі Віцебска магчымасць выкарыстання яго земляў пад камерцыйную забудову.

Вытворчасць прамысловай прадукцыі на Віцебшчыне ў студзені - жніўні 2022 года ўпала на 6,3% у параўнанні з тым жа перыядам у 2021 годзе. Адпаведна: валавы рэгіянальны прадукт паменшыўся на 2,7%, спажывецкія кошты падскочылі на 15,5%, падатковыя паступленні дадалі 12,8%. Пра гэта паведамляе Галоўнае статыстычнае ўпраўленне Віцебскай вобласці.