Рашэнне прызнаць "экстрэмісцкім" youtube-канал Кацярыны Мірзоевай суд прыняў 14 лютага. Праз чатыры дні інфармацыя пра гэта з’явілася ў Рэспубліканскім спісе экстрэмісцкіх матэрыялаў.

На гэтым рэсурсе звяртаюць на сябе ўвагу два кароткія відэролікі пра тое, як аўтарка ў 2021 годзе была вымушана хутка пераехаць ва Ўкраіну. З’язджала “месяцы на два”, але неўзабаве стала ясна, што ў Беларусі яе чакаюць рэпрэсіі, і жанчына перабралася ў Польшчу.

Што да вандроўнага жыцця, то такія перамены ў лёсе жанчыны ўжо былі: яна жыла ў Глыбокім, у Полацку, потым 10 гадоў працавала ў Расіі. Даводзілася рабіць усе, каб падтрымліваць сваіх дваіх дзяцей, якіх гадавала адна.

У 2020 годзе жанчына актыўна выказала сваю пазіцыю, выступіўшы на стрыме ў Ціханоўскага, потым узяла ўдзел у мітынгах у некалькіх райцэнтрах. Калі пачаліся масавыя паслявыбарчыя пратэсты, Кацярына збірала перадачы для затрыманых. Па «народным» артыкуле 23.34 КаАП у 2020-м прайшоў і яе сын. Ужо тады яна вяла свой youtube-канал, дзе гаварыла пра ўсё, што набалела. Бывала, што ў каментарах яе актыўна падтрымлівалі, а бывала, што і пагражалі.

З’язджаць з Беларусі вырашыла, бо да гэтага штурхала трывога за сына: яго выклікалі ў міліцыю, у Следчы камітэт, і ўсё хілілася да таго, што супраць хлопца завядуць крымінальную справу.З’язджалі з ім разам ва Ўкраіну - такі самы шлях прайшлі сотні беларусаў. Потым пераехала ў Польшчу, жыла ў некалькіх гарадах - у Кракаве, у Зялёнай Гуры, у Познані. Але Кацярына ўсё адно марыць вярнуцца ў Полацк. Як толькі гэта будзе магчыма.

Раіса Наімава