Ад 14 ліпеня 2021 году ўлады распачалі ліквідацыю культурна-асветніцкай установы «Цэнтр урбаністычных праектаў і ініцыятыў «Прастора». Гэтае грамадскае аб'яднанне было зарэгістраванае ў якасці юрыдычнай асобы ў студзені 2016 году ў Віцебскім раёне. Называецца і прычына закрыцця ўстановы: «Неажыццяўленне камерцыйнай арганізацыяй прадпрымальніцкай дзейнасці на працягу дваццаці чатырох месяцаў запар».

Мясцовыя ўлады вырашылі, што гэтая грамадзянская ініцыятыва, якая актыўна працавала ў прасоўванні культурных і гендарных праектаў у Полацкім рэгіёне, мусіць быць ліквідаваная, бо яе дзейнасць носіць дэструктыўны характар і прыносіць шкоду грамадству і дзяржаве.

Права на захаванне і развіццё культурнай спадчыны і нацыянальнай ідэнтычнасці важнае для людзей і мусіць ўсяляк падтрымлівацца дзяржавай. У нашай краіне гэтае права абмяжоўваецца ўладамі, імі ствараюцца перашкоды, іншым разам - непасрэдныя забароны на яго рэалізацыю.

Як стала вядома, 15 ліпеня 2021 году дырэктар таварыства з абмежаванай адказнасцю "Савіка" А. Гуйвік паведаміў кіраўніку Цэнтру інфармацыйна-прававой падтрымкі сацыяльна ўразлівых груп насельніцтва "Адвакацыя" Мікалаю Шараху аб скасаванні з сярэдзіны жніўня дамовы арэнды. У інфармацыйным лісце паведамляецца, што прычынай разрыву арэндных адносінаў стала змена ўласніка памяшканняў.