Дакумэнт «Аб віетнамскай працоўнай сіле» адміністрацыя Першамайскага раёну Віцебску рассылае кіраўнікам прадпрыемстваў. У гэтым дакумэнце паведамляецца наступнае: «Адміністрацыя Першамайскага раёну г. Віцебску інфармуе, што паводле ліста амбасады Рэспублікі Беларусь у Віетнаме існуе магчымасьць выкарыстаньня на тэрыторыі вобласьці віетнамскай працоўнай сілы (будаўнікі, швачкі, сельскагаспадарчыя рабочыя, сьлесары, мэханікі, зваршчыкі)».

Судзьдзя Кастрычніцкага раёну Віцебску Вікторыя Лешчанка забараніла прафсаюзнаму юрысту Валеру Місьнікаву і рэгіянальнаму прадстаўніку прафсаюзу РЭП Георгію Разумаву прадстаўляць у судзе інтарэсы сябра прафсаюзу Алены Шандзюковай. Юрыдычна непісьменная жанчына засталася сам-насам з судзьдзёй і трыма адвакатамі юрыдычнай кансультацыі № 2, супраць якой яна падала пазоў.

Пра гісторыю свайго звальненьня распавёў сябар партыі БНФ Аляксандар Ільінец, які працаваў майстрам у брыгадзе цэху ўласнай вытворчасьці ў краме №139 гандлёвай сеткі “Веста”, займаўся выпечкай хлеба-булачных і кандытарскіх вырабаў. Ён цьвердзіць, што нараканьняў на сваю працу з боку кіраўніцтва ня меў, але пасьля таго, як стала вядома пра ягоны ўдзел у кампаніі “Зробім лепш”, пачаліся праблемы. Паводле словаў актывіста, яму прапанавалі разьвітацца з працай - “па-добраму”, пасьля тэлефанаваньня дырэктарцы крамы.

Адміністрацыя ААТ “Полацак-Шкловалакно” сьцьвярджае, што праблеме гарачага харчаваньня на прадпрыемстве надаецца самая сур’ёзная ўвага. Маўляў, сталоўкі, кулінарыя, малочны пункт забясьпечваюць завадчан якаснай ежай, выпечкай, прадуктамі, у цэхах абсталююцца пакоі прыёму ежы, куды набываюцца неабходныя электрапрыборы. Аднак у цэху № 7 пакою прыёму ежы дагэтуль няма, хаця інтэнсыўнасьць працы работнікаў цэху вельмі высокая, і не заўсёды ёсьць час схадзіць у сталоўку.