Віцебскі журналіст - адзін зь пераможцаў конкурсу “Прэс-фота Беларусі”
Сярод сёлетніх ляўрэатаў прэстыжнага конкурсу прафэсійнай мэдыя-фатаграфіі “Прэс-фота Беларусі” ёсьць рэдактар штодзённай інтэрнэт-газэты “Народныя навіны Віцебска” Сяржук Серабро. Ён заняў першае месца ў намінацыі “Навіны” з сэрыяй фотаздымкаў, якія былі зробленыя падчас суду над вядомым дэмакратычным актывістам Сяргеем Каваленкам.
Справа «шпіёна» Гайдукова развалілася?
Старшыня КДБ Валер Вакульчык ня вытрымаў. «Шпіёнская справа», якую з такой радасьцю вёў КДБ у дачыненьні да апэратара наваполацкага «Нафтану» Андрэя Гайдукова, падобна, скончылася. Замест яе будзе нейкае іншая справа. Пра гэта Вакульчык заявіў 19 чэрвеня журналістам.
Старшыня райсуду лічыць, што Пётар Іваноў парушыў Крымінальны кодэкс
Віцебскі грамадзкі дзеяч Пётар Іваноў прасіў кампэтэнтныя ворганы ўзбудзіць крымінальную справу супраць судзьдзі Валянціны Кісьмярошкінай, якая, на ягоную думку, сьвядома парушыла закон і несправядліва пакарала яго штрафам у памеры 4-х мільёнаў рублёў па адміністрацыйнай справе. Аднак, выглядае, да крымінальнай адказнасьці могуць прыцягнуць не судзьдзю, а самога Пятра Іванова: па гэта да начальніка ўпраўленьня Сьледчага камітэту па Віцебскай вобласьці Ўладзімера Шалухіна зьвярнуўся старшыня суду Першамайскага раёну Віцебску А.А. Андрушэнка.
Суд над Андрэем Гайдуковым працягнецца 17 чэрвеня
13 чэрвеня ў судовае паседжаньне па справе Андрэя Гайдукова выклікалі сьведак. «Гэта былі людзі ў міліцэйскай форме», — сказаў праваабаронца Павал Левінаў. Вольга Гайдукова паведаміла, што суд над яе сынам будзе працягнуты ў панядзелак, 17 чэрвеня. Так ёй сказалі адвакаты Андрэя Гайдукова. Яны паведамілі, што хлопец трымаецца спакойна, але па-ранейшаму не зусім здаровы: гаварыць ня можа праз кашаль. У наступны панядзелак працягнуць дапытваць сьведкаў. У прыватнасьці, у якасьці сьведкі ў суд выкліканы жыхара Наваполацку Ільля Багданаў.
Маці і сястра расстралянага “тэрарыста” патрабуюць ад МЗС зьвестак пра абнародаваньне рашэньня КПЧ ААН па іх справе
Як паведаміў праваабаронца Раман Кісьляк, маці і сястра Ўладзіслава Кавалёва, аднаго з двух расстраляных паводле абвінавачаньня ў зьдзяйсьненьні тэракту ў менскім мэтро, дамагаюцца атрыманьня інфармацыі пра апублікаваньне ў Беларусі рашэньня камітэту ААН наконт іх справы. 13 чэрвеня Любоў Кавалёва і Тацьцяна Козяр накіравалі на імя кіраўніка МЗС Уладзімера Макея заяву, у якой просяць паведаміць зьвесткі пра тое, якім кампэтэнтным дзяржворганам і ў якім беларускім друкаваным выданьні апублікаванае рашэньне камітэту.
Віцебскі аблсуд: Дзьве скаргі палітыкаў - дзьве адмовы
Актывіст КХП БНФ Ян Дзяржаўцаў спрабаваў аспрэчыць рашэньне Кастрычніцкага райсуду, дзе яму прысудзілі штраф за несанкцыянаваны пікет у дзень угодкаў Чарнобыльскай трагедыі. Старшыня абласной арганізацыі партыі БНФ Леанід Аўтухоў падаваў касацыйную скаргу на рашэньне таго ж суду: за распаўсюд партыйнага бюлетэню «Магістрат» яму прысудзілі штраф як парушальніку заканадаўства пра СМІ. Абедзьве касацыйныя скаргі адмовілася задаволіць судзьдзя Ірына Смалякова.
Міліцыя і людзі ў цывільным перашкаджалі працы журналістаў (відэа)
Журналісты, што прыехалі ў Віцебск на суд над Андрэем Гайдуковым сутыкнуліся з актыўным процідзеяньнем з боку міліцыі і супрацоўнікаў у цывільным. Калі журналісткі паспрабавалі ўзяць камэнтар у праваабаронцы Паўла Левінава, падышоў нейкі чалавек, які выдааваў зь сябе глуханямога, і стаў перашкаджаць працаваць, паводзіўся неадэкватна. Маёр міліцыі Віталь Вячаслававіч Фралоў неаднаразова заяўляў: «Я Вас папярэджваю: нельга». У журналістак спрабавалі забраць камэру.
Распачаўся суд над «шпіёнам» Андрэем Гайдуковым
12 чэрвеня Віцебскі абласны суд пачаў разглядаць справу Андрэя Гайдукова, 23-гадовага навапалачаніна, якога вінавацяць у «здрадзе дзяржаве». Суд закрыты. На працэс не дапушчаныя ні журналісты, ні праваабаронцы. Кіраўніцтва РГА “Беларускі Хэльсынскі камітэт” афіцыйна прасіла старшыню абласнога суду дапусьціць Паўла Левінава да працэсу над Гайдуковым, аднак праваабаронцу ў гэтым было адмоўлена без тлумачэньня прычын. Маці Гайдукова, якая жыве ў Полaцку, у суд не прыехала. Як лічыць Левінаў, гэта можа быць зьвязана з тым, што на жанчыну аказваюць ціск, запалохваючы яе.
«Шпіён» Андрэй Гайдукоў захварэў напярэдадні суду
Падазраваны ў «здрадзе дзяржаве» Андрэй Гайдукоў этапаваны ў Віцебск. Пра гэта паведаміла яго маці Вольга Гайдукова: «Самая дрэнная навіна ў тым, што мой сын хварэе. У пятніцу ён меў тэмпэратуру вышэй за 38 градусаў. З 3 чэрвеня Андрэй знаходзіцца ў Віцебску, але ўжо тыдзень няма ніводнага ліста. Я ўсё даведаюся праз адваката, і гэта хаця б неяк спрашчае праблему», - адзначыла маці палітычнага вязьня.
Сьледчыя дапыталі лекараў Віцебскага дзіцячага абласнога клінічнага шпіталя
Сьледчыя дапыталі лекараў у межах расьсьледаваньня крымінальнай справы па факце сьмерці двухмесячнага дзіцяці ў Віцебскім дзіцячым абласным клінічным шпіталі. “Цягам мінулых выходных сьледчыя дапыталі лекараў шпіталя, дзе памерла дзіця, а таксама канфіскавалі неабходныя дакумэнты для правядзеньня складаных экспэртыз”, - паведаміла агенцтву “Інтэрфакс-Захад” у панядзелак афіцыйны прадстаўнік УСК па Віцебскай вобласьці Іна Гарбачова. - Расьсьледаваньне справы працягваецца”.