Жыхар пасёлка Беразіно Менскай вобласці, блогер і актывіст Павел Вінаградаў быў асуджаны да 5-ці гадоў пазбаўлення волі ў калоніі агульнага рэжыму. На пачатку ліпеня 2022 г.яго этапавалі ў ваўкавыскую ПК № 11, але неўзабаве ў палітвязня на рэнтгене знайшлі пляму ў лёгкіх. Ён прайшоў курс антыбіётыкаў, але гэта не прынесла плёну. 28 ліпеня 2022 г. Вінаградава перавялі ў аршанскую калонію № 12, так званую «сухотную». Паводле інфармацыі ад тых, каго там утрымлівалі, умовы ў гэтай калоніі небяспечныя для здароўя.

Працягваюцца рэпрэсіі ў дачыненні да жыхароў Віцебскай вобласці, якія актыўна выказвалі сваю пазіцыю пад час пратэстаў 2020-2021 гадоў. Асабліва цяжка даводзіцца тым грамадзянскім актывістам, якія знаходзяцца ў месцах адбыцця пакарання.

Дзень народзінаў у палітзняволенага апазіцыйнага палітыка будзе 12 жніўня. Мікалай Статкевіч вымушаны сустрэць сваё свята ў глыбоцкай калоніі, увогуле ж за кратамі ён знаходзіцца больш к 790 дзён. Ён быў затрыманы 31 траўня 2020 г. па дарозе на Камароўскі рынак у Мінску, дзе ён збіраўся наведаць перадвыбарчы пікет Святланы Ціханоўскай. 14 снежня 2021 г. яго асудзілі на 14 гадоў зняволення ў калоніі асаблівага рэжыму паводле ч. 1 арт. 293 Крымінальнага кодэксу («Арганізацыя масавых беспарадкаў»).

Актывіста руху анархістаў, які адбывае пакаранне ў віцебскай калоніі «Віцьба-3», кінулі ў штрафны ізалятар на 10 сутак 29-га ліпеня, гэта быў якраз ягоны дзень народзінаў. У выніку ён не трапіў на запланаванае кароткатэрміновае спатканне з сястрой. Раней яго пазбавілі працяглага спаткання – так робяць з усімі палітзняволенымі ў некаторых калоніях. З першага дня ў ПК-3 яго паставілі на асаблівы ўлік як «асобу, схільную да ўцёкаў».