У краіне заробкі павялічыліся, а на Віцебшчыне — зьменшыліся
Налічаная сярэдняя заработная плата работнікаў Віцебскай вобласьці ў другім месяцы бягучага году склала 4 723 340 і за месяц зьмешылася на 25 572 рубля. У сярэднім па краіне ў лютым назіраўся невялічкі рост заробкаў - у параўнаньні са студзенем яны павялічыліся на 1,3%, або на 66 800 рублёў. Праўда, гэты рост тычыцца толькі налічаных сум. З-за інфляцыі, якая ў лютым 2014 г. склала 2%, рэальныя даходы насельніцтва Беларусі зьменшыліся.
Сябра КХП-БНФ Ян Дзяржаўцаў правядзе найбліжэйшы тыдзень пад арыштам
7 сутак арышту – такі вэрдыкт у дачыненьні да актывіста Кансэрватыўна-хрысьціянскай партыі БНФ Яна Дзяржаўцава вынесла 26 сакавіка судзьдзя суду Першамайскага раёну Віцебску Натальля Карабліна. Партыец пакараны паводле артыкулу 23.34 КаАП (парушэньне парадку арганізацыі або правядзеньня масавых мерапрыемстваў) за ўдзел у пікеце супраць «выбарчага фарсу» ля выбарчага ўчастку 22 сакавіка.
Выбаршчыкі Віцебскай вобласьці – самыя актыўныя ў краіне
На Віцебшчыне ўдзел у выбарах дэпутатаў мясцовых саветаў узялі каля 82,4% выбаршчыкаў, і гэта самы высокі вынік сярод абласьцей Беларусі. Па выніках выбарчай кампаніі сфармаваныя ўсе 224 мясцовыя саветы, якія найбліжэйшым часам павінны распачаць працу.
Таемныя суды над апазыцыянэрамі Барысам Хамайдам і Аляксандрам Салаўянам адбыліся ў Віцебску
27 сакавіка а 20-й гадзіне вызваляюцца з-пад арышту віцебскія актывісты Барыс Хамайда і Аляксандар Салаўян. Яны былі затрыманыя, імаверна, напярэдадні Дня волі ўвечары 24 сакавіка. Актывісты былі асуджаныя судом Чыгуначнага раёну Віцебску на трое сутак. Аднак дагэтуль невядомая прычына затрыманьня і паводле якога артыкулу былі ўзбуджаныя адміністрацыйныя справы.
Дзень Волі ў Віцебску: арыштаваны актывіст КХП-БНФ Ян Дзяржаўцаў
Апазыцыянэра затрымалі пасьля ўскладаньня кветак да помніку Караткевічу і памятнай дошкі Быкаву. Пра гэта паведаміла Алена Каваленка: «Яна Дзяржаўцава затрымалі каля 14 гадзін на вуліцы Кірава ў Віцебску, ён вяртаўся дадому пасьля ўскладаньня кветак з нагоды Дня Волі да помніку Ўладзімеру Караткевічу і памятнай дошкі Васілю Быкаву. А да гэтага сваякі актывіста паведамілі, што да яго прыходзілі двое міліцыянтаў дадому. Да мяне 10 хвілін таму прыйшла суседка і сказала, што мяне таксама шукалі два міліцыянты».
Большасьць працоўных мігрантаў у Віцебску - грамадзяне Ўкраіны, Кітая і Латвіі
Асноўная частка працоўных мігрантаў у Віцебску прадстаўленая грамадзянамі Ўкраіны, якія занятыя ў сельскай гаспадарцы, КНР і Латвіі - будаўнічая і лесанарыхтоўчая галіны адпаведна, паведаміла газэце “Витебские вести” начальніца аддзяленьня па грамадзянстве і міграцыі Чыгуначнага раёну Віцебску Тацьцяна Феакцістава.
Кіраўнікі праўладных прафсаюзаў зарабляюць да 17 мільёнаў у месяц
Дзякуючы выбарчай кампаніі рэсурсу Praca-by.info удалося даведацца, якія даходы атрымліваюць людзі, якія працуюць у праўладных прафсаюзах. Кандыдаты ў дэпутаты мусілі падаваць у выбаркамы дадзеныя пра свае даходы. Сярод тых, хто нацэльваўся на дэпутацкае крэсла, аказаліся і прадстаўнікі прафсаюзаў ФПБ.
Хакеры і ананімы актывізаваліся ва ўсіх рэгіёнах
За апошнія тыдні служба маніторынгу ГА “Беларуская асацыяцыя журналістаў” зафіксавала шмат розных выпадкаў з падобным почыркам.
У Полацку і Наваполацку лекары на тыдзень адмовяцца ад правядзеньня абортаў
27-28 сакавіка, па блаславеньні мітрапаліта Менскага і Слуцкага Паўла, патрыяршага экзарха ўсяе Беларусі, у Наваполацку і Полацку пройдзе акцыя «Разам - у абарону жыцьця». У межах акцыі на працягу тыдня, з 27 сакавіка па 3 красавіка, у шпіталях і жаночых кансультацыях Наваполацку і Полацку мэдычныя работнікі адмовяцца ад зьдзяйсьненьня штучнага перапыненьня цяжарнасьці (абортаў).
У Віцебску прайшоў мітынг прыхільнікаў стварэньня аб’яднаньня «За сумленную ўладу» (дададзена відэа)
У мітынгу ў падтрымку кандыдата ў дэпутаты Віцебскага абласнога савету Віктара Жаркова, які адбыўся 20 сакавіка на заднім двары адной са школ абласнога цэнтру, узялі ўдзел зь дзясятак чалавек. Большасьць зь іх – гэта сябры ўтворанай месяц таму генэральнай рады па стварэньні міжнароднага грамадзкага аб’яднаньня «За сумленную ўладу» на чале са старшынём рады Пятром Івановым.