Выбары ў Віцебску: Маркотна й мокра, як на пахаваньні…
На ўсіх выбарчых участках 23 верасьня ў Віцебску амаль аднолькава пахла беляшамі і піражкамі з капустай. Але людзі насы не адварочвалі, бо сярод іх бадай што не было маладых выбарцаў… Людзей да трыццаці было вобмаль. Але й віцябляне старэйшага ўзросту асаблівай радасьці ды аптымізму на падыходзе да ўчасткаў не праяўлялі. Агульны настрой вельмі дасьціпна выявіў пэнсіянэр з кійком, які, усьміхнуўшыся аўтару гэтых радкоў, заўважыў: “Як на пахаваньне ідуць сюды, і музыка такая ж… З адной толькі розьніцай: на хаўтурах не галасуюць, а галосяць”.
Віцебскага назіральніка выдалілі з участку для галасаваньня
Незалежнага назіральніка ад Беларускага Хэльсынскага Камітэту Яна Дзяржаўцава выдалілі 22 верасьня з ўчастку №14 Віцебскай-Чыгуначнай выбарчай акругі №19. Ён нібыта перашкаджаў працаваць камісіі. Пра гэта сам назіральнік даведаўся, калі прыйшоў на выбарчы ўчастак пасьля абеду. Як распавёў “Дыялёгу” Ян Дзяржаўцаў, дзеля таго, каб пазбавіць яго права назіраць за выбарамі, была скліканая ўся камісія. Сямнаццаць чалавек выбарчай камісіі адзінагалосна прагаласавалі за тое, каб выдаліць назіральніка з участку. Яму нават ня далі слова.
Больш за тысячу жыхароў Віцебску ня трапілі ў сьпісы выбарцаў
На выбарчым участку №44 Віцебскай-Чкалаўскай выбарчай акругі № 18 дагэтуль адсутнічаюць сьпісы больш за тысячу выбарцаў, якія жывуць у новым мікрараёне Мэдцэнтар у Віцебску. Адсутнасьць сьпісаў выявіў назіральнік Сяргей Парсюкевіч. Апынулася, што жыхароў дамоў №№nbsp;37 і 39 па вуліцы Петруся Броўкі няма ў сьпісах выбарцаў.
Мірон павіншаваў жыхароў Віцебшчыны з днём Пагоні
Бел-чырвона-белы сьцяг быў узьняты ў ноч на 19 верасьня на высакавольтнай лініі электраперадач недалёка ад пасёлку Руба пад Віцебскам. «19 верасьня 1991 году легітымны парлямэнт Беларусі засьведчыў дзяржаўным гербам старажытны герб „Пагоня“, а дзяржаўным сьцягам - бел-чырвона-белы гістарычны сьцяг. З гэтай сымболікай мы адбудуем нашу дзяржаву! Жыве Беларусь! Жыве вечна! Мірон», - цытуе Радыё Свабода, спасылаючыся на дасьведчаныя крыніцы, цыдулку, прымацаваную да сьцягу.
Яўген Гуцалаў павінен правесьці за кратамі 7 дзён
Суд Кастрычніцкага раёну Віцебску 19 верасьня прызнаў вінаватым Яўгена Гуцалава ў парушэньні парадку арганізацыі і правядзеньня масавых мерапрыемстваў (арт. 23.34 КаАП) і пакараў яго 7 суткамі адміністратыўнага арышту. Як паведаміў віцебскі актывіст Пётар Іваноў, які прысутнічаў на паседжаньні, у судзе Яўген Гуцалаў прызнаў, што насамрэч браў удзел у несанкцыянаваным пікеце, але такім чынам хацеў выявіць свае погляды.
Затрыманы ў Віцебску назіральнік Яўген Гуцалаў просіць дапамогі адваката
Пра гэта паведаміў віцебскі актывіст Пётар Іваноў, якому 18 верасьня позна ўвечары патэлефанавалі з Кастрычніцкага РАУС Віцебску і перадалі просьбу Гуцалава аб адвакаце. Яўгена Гуцалава затрымалі каля 14:00 проста на выбарчым участку (71-ы участак Віцебскай Кастрычніцкай выбарчай акругі), дзе ён быў назіральнікам ад кампаніі “Справядлівыя выбары 2012″. Недзе а 13-й гадзіне на сваёй старонцы ў Фэйсбуку ён паведаміў: “Мяне ўжо шукаюць мiлiцыянты”.
Аляксандру Мікуліну не дазволілі разьмясьціць агітацыйны матэрыял на стэндзе Ўпраўленьня сьледчага камітэту
Кандыдат у дэпутаты па Віцебскай-Чкалаўскай выбарчай акрузе №18 Аляксандар Мікулін праводзіў 13 верасьня дзень інфармаваньня насельніцтва. Ва ўпраўленьні сьледчага камітэту па Віцебскай вобласьці агітаваць яму забаранілі. “На стэндзе ў сьледчых не было аніякай інфармацыі пра зарэгістраваных кандыдатаў. Але разьмясьціць сваю агітацыйную прадукцыю нам забаранілі. Спаслаліся на загад кіраўніцтва. Маўляў, на тэрыторыі сьледчага камітэту выбарчы закон ня дзейнічае. Аднак супрацоўнікі камітэту ўлёткі ўзялі і зь цікавасьцю азнаёміліся са зьместам”, – распавёў “Дыялёгу” кандыдат Мікулін.
Сяргей Парсюкевіч: Мне здаецца, што я выконваю абавязкі дэпутата мясцовага савету
Каардынатар кампаніі «Гавары праўду» ў Віцебску Сяргей Парсюкевіч падаў 13 верасьня ў Віцебскі гарвыканкам і гарсавет чатыры калектыўных звароты грамадзян з настойлівымі просьбамі аб вырашэньні надзённых праблем. Нагадаем, у канцы жніўня акруговая камісія не зарэгістравала Сяргея Парсюкевіча ў якасьці кандыдата, забракаваўшы подпісы выбаршчыкаў. Цяпер ён прадставіў на разгляд дзейным дэпутатам гарадзкога савету і чыноўнікам гарвыканкаму калектыўныя звароты, пад якімі падпісаліся 600 віцяблян. Гэтыя подпісы – не збракуеш.
Суд Першамайскага раёну Віцебску прызнаў слушнай забарону пікету за байкот выбараў
Суд Першамайскага раёну Віцебску не задаволіў скаргу сябры партыі КХП БНФ Пётры Сарапені на рашэньне Першамайскай адміністрацыі аб забароне пікету за байкот выбараў. Скаргу разглядала намесьніца старшыні суду Вольга Ільлюшонак. На пачатку паседжаньня Сарапеня заявіў хадайніцтва, каб працэс вёўся на беларускай мове. Судзьдзя адмовіла. Маўляў, мовамі судовых паседжаньняў у нашай краіне зьяўляюцца дзьве – руская і беларуская.
Да Сяргея Каваленкі не даходзіць карэспандэнцыя
Два тыдні запар жонка Сяргея Каваленкі Алена ня мае ад мужа званкоў і лістоў. Алена кажа, што праблема з карэспандэнцыяй ёсьць і ў Сяргея: «Ёсьць праблема зь лістамі. Наш агульны сябар распавёў, што зьвязваўся зь Сяргеем, а адказу няма. І ад сваякоў не дайшлі лісты — адвакат пра гэта цікавіўся і высьветліў. І вось да мяне лісты ідуць дрэнна. Апошні дайшоў 31-га жніўня, а адпраўлены быў 21-га. 10 дзён для ліста з Магілёва — гэта зашмат. Яго толькі выпусьцілі праз тыдзень — я паглядзела па штэмпэлі. Хаця паводле закону даецца толькі тры дні».