26 траўня ў судзе Віцебскага раёну скончылася судовае следства і адбыліся спрэчкі ў справе выхавальніцы дзіцячага садку Таццяны Туравец, якую вінавацяць паводле арт. 364 КК у гвалце і пагрозе гвалтам у дачыненні да супрацоўнікаў МУС. Пракурор Мікіта Раманоўскі запатрабаваў для Туравец тры гады калоніі, адвакатка ж прасіла апраўдаць сваю падабаронную. Прысуд агучаць 28 траўня.

25 траўня Віцебскі абласны суд разгледзеў апеляцыйную скаргу палітвязня Уладзіміра Малахоўскага, асуджанага судом Першамайскага раёну Віцебску на тры з паловай гады зняволення. Калегія па крымінальных справах аблсуду пад старшынствам суддзі Галіны Урбановіч скаргу не задаволіла і прысуд не змяніла.

Магілёўскі абласны суд абвясціў прысуд семярым палітвязням, якіх абвінавацілі ў арганізацыі масавых беспарадкаў. Самыя суровыя пакаранні прысудзілі актывістам кампаніі «Еўрапейская Беларусь» Яўгену Афнагелю, Андрэю Войнічу і сустаршыні Беларускай Хрысціянскай Дэмакратыі Паўлу Севярынцу – па 7 гадоў пазбаўлення волі ў калоніі ўзмоцненага рэжыму, паведамляе Беларускае Радыё Рацыя.

На Віцебшчыне працягваецца крымінальнае «паляванне» і несправядлівыя судовыя пакаранні грамадзян за абразу, работнікаў міліцыі і кіраўніка дзяржавы, распаўсюджаныя ў сацыяльных сетках. 24 траўня, пракуратура Аршанскага раёна падтрымала ў судзе дзяржаўнае абвінавачанне па крымінальнай справе ў дачыненні да жыхара Воршы, які, на думку следства, публічна абразіў прадстаўніка ўлады.

24 траўня ў судзе Віцебскага раёну мусілі працягнуцца слуханні ў справе жыхаркі пасёлку Ноўка Віцебскага раёну Таццяны Туравец, абвінавачанай паводле артыкулу 364 КК («Гвалт або пагроза ўчынення гвалту да супрацоўнікаў МУС»). Аднак праз 5 хвілін пасля пачатку паседжання ў працэсе абвясцілі чарговы перапынак.

Праваахоўныя органы не змаглі знайсці вінаватых у зʼяўленні пакаяннага відэазвароту актывіста з Віцебску Алега Баразны на телеграм-канале «Наши сливы». Пра адмоўны вынік сваіх намаганняў яны паведамілі праваабаронцу Паўлу Левінаву.

Камітэт па правах чалавека ААН зарэгістраваў пад нумарам 3306 скаргу журналіста Змітра Лупача з Глыбокага. Журналіст настойвае на тым, што беларуская дзяржава парушыла патрабаванне арт. 19 Міжнароднага пакту аб грамадзянскіх і палітычных правах – то бок крытычна абмежавала яму магчымасці свабодна выказваць прафесійнае меркаванне.

21 траўня з віцебскага ізалятару часовага ўтрымання (ІЧУ) выйшла на волю 23-гадовая Лізавета Кірыенка, якая працуе выхавальніцай у дзіцячым садку. Лізавету павінны былі вызваліць яшчэ 6 траўня, але незадоўга да заканчэння тэрміну на яе завялі новую адміністрацыйную справу – суд дадаў ёй яшчэ 15 сутак арышту. Агулам за кратамі яна правяла 25 дзён.

У Віцебску распачалі крымінальную справу за зняважлівы каментар у сацыяльных сетках на адрас Аляксандра Лукашэнкі (арт. 368 КК). Яго нібыта зрабіў 39-гадовы жыхар абласнога цэнтру. Мужчыне пагражае да двух гадоў пазбаўлення волі, паведамляе аддзяленне інфармацыі і грамадскіх сувязяў УУС Віцебскага аблвыканкаму.

20 траўня з ізалятару часовага ўтрымання ў Віцебску вызвалілі Алену Радзькову, Наталлю Рэфенкулаву, Аляксандра Шэлепня. Яны былі затрыманыя ў Полацку і Наваполацку на 72 гадзіны як падазраваныя ў крымінальнай справе па арт. 341 КК («Апаганьванне збудаванняў і псаванне маёмасці») і этапаваныя ў Віцебск. Пазней на волю павінен быў выйсці Артур Сінега.