За студзень 2022 года судамі Віцебскай вобласці было прынята 13 пастаноў аб прылічэнні камунікацыйных рэсурсаў да распаўсюджвальнікаў экстрэмісцкага кантэнту. Адзін з іх сапраўды вёў прапаганду экстрэмізму, а астатнія 12 былі звязаныя з пратэстнай актыўнасцю, якая ўзнікла па прычыне фальсіфікацыі ўладамі вынікаў галасавання падчас прэзідэнцкіх выбараў 2020 года. 

За першыя тры тыдні 2022 году рашэннямі судоў Віцебску і Віцебскай вобласці былі залічаныя ў рэспубліканскі спіс экстрэмісцкіх матэрыялаў 7 інфармацыйных рэсурсаў. Пры гэтым суды скарысталіся правам неадкладнага выканання сваіх рашэнняў, паколькі, на думку суддзяў, прамаруджванне ў выкананні рашэнняў можа нанесці значную шкоду дзяржаве або зрабіць немагчымым самое іх выкананне. 

20 студзеня суд Полацку і Полацкага раёну прысудзіў 38-гадовага Руслана Слуцкага да 11 гадоў пазбаўлення волі ў калоніі ўзмоцненага рэжыму. Мужчына прызнаны вінаватым у акце тэрарызму (ч. 1 арт. 289 КК) і замаху на прывядзенне ў непрыдатнасць чыгуначных шляхоў зносін (ч. 1 арт. 14, ч. 1 арт. 309 КК). Суд цягнуўся больш за месяц, бо пацярпелымі ў справе праходзіла каля 70 чалавек, паведамляе «Вясна».

Спартовы журналіст, блогер і футбаліст «Крумкачоў» Аляксандр Івулін быў асуджаны 19 лютага на два гады калоніі агульнага рэжыму. Суд Савецкага раёну Менску прызнаў яго вінаватым ва ўдзеле ў дзеяннях, якія груба парушаюць грамадскі парадак (ч.1 арт. 342 КК). Апроч таго, абвінавачанне палічыла, што журналіст на сваім ютуб-канале «ЧестнОК» размяшчаў відэазапісы, заахвочвальнага характару, каб стварыць негатыўную ацэнку дзейнай улады.