Выйшла з друку «Шэрая кніга», у якой падаецца хроніка парушэнняў правоў чалавека ў Віцебскім рэгіёне са студзеня па снежань 2020 году. Аб’ём кнігі складае 157 старонак, на якіх распавядаецца пра 185 выпадкаў парушэння ўладамі правоў жыхароў вобласці. Аўтары выдання падрыхтавалі таксама электронную версію кнігі, якую размясцілі ў інтэрнэце (спампаваць можна тут), так што азнаёміцца з яе зместам і пры жаданні надрукаваць можа кожны ахвотны.

17 снежня з папраўчай установы адкрытага тыпу (ПУАТ) №9 выйшаў на свабоду гарадзенскі музыка і актывіст Ігар Банцэр. Апошнія дні перад вызваленнем ён правёў у штрафным ізалятары ў Гарадку. Знаходзячыся ў зняволенні, Банцэр некалькі разоў абвяшчаў галадоўкі. «На жаль, не магу сфармуляваць гэта такім чынам, што я зараз на волі», – сказаў па вызваленні Ігар Банцэр.

Супрацоўнікаў міліцыі цікавіла, ці наведвае актывістка тэатральныя пастаноўкі віцебскага тэатру імя Якуба Коласа, ці яна глядзела спектакль «Ціль», што быў зняты з рэпертуару адразу пасля прэм’еры 21-га лістапада. А таксама ці не брала яна ўдзел у «партызанскай» акцыі салідарнасці са звольненым дырэктарам і акторамі, якія страцілі працу пасля ўдзелу ў пастаноўцы, паведамляе Беларускае Радыё Рацыя. 

Год таму жыхар Полацку Анатоль Каханчык пафарбаваў бацькоўскую хату ў вёсцы Алёшча Полацкага раёну ў нацыянальныя колеры: намаляваў на сценах дзве белыя і чырвоную палосы, а ў акне павесіў Пагоню. За такую расфарбоўку ў лютым 2021 году Каханчыка прыцягнулі да адміністрацыйнай адказнасці (на той момант – арт. 23.34 КаАП) і асудзілі на 7 сутак. Ужо ў лістападзе, калі адбываў чарговы арышт, следчыя прыгразілі яму крымінальнай справай, калі не перафарбуе дом. Пра гэта піша Беларускае Радыё Рацыя.