Пасьля адмовы Першамайскай раённай адміністрацыі на правядзеньне мітынгу ў Дзень Волі ў сувязі з «занятасьцю» Парка імя 30-годзьдзя ВЛКСМ пад спартовыя мерапрыемствы, дэмакратычныя актывісты Хрыстафор Жаляпаў і Аляксей Гаўруцікаў просяць пазнаёміць іх з усім гадавым плянам выкарыстаньня гэтага парку. З такой просьбай яны зьвярнуліся ў Віцебскі гарвыканкам. А ў адміністрацыю Першамайскага раёну падалі яшчэ 2 заяўкі на масавыя мерапрыемствы. 12 красавіка яны мяркуюць правесьці мітынг супраць зьбядненьня беларускага народу і ў падтрымку палітвязьняў, а 26 красавіка – мітынг з нагоды 27-х угодкаў аварыі на Чарнобыльскай АЭС.

Камітэтам па правох чалавека ААН за № 2235/2013 і № 2236/2013 зарэгістраваныя два новыя звароты праваабаронцы Паўла Левінава. У гэтых зваротах Павал Левінаў просіць камітэт прызнаць Рэспубліку Беларусь парушальнікам шэрагу артыкулаў Міжнароднага пакту аб грамадзянскіх і палітычных правох.

Падчас сёлетняга сьвяткаваньня Дня Волі Антаніна Піванос нарэшце змагла ўручыць падарунак віцебскаму распаўсюдніку незалежнай прэсы Барысу Хамайду. Габэлен, на якім актывістка вышыла словы малітвы «Ойча наш», падобны да габэлену, які яна зьбіралася падарыць спадару Хамайду яшчэ ў 2008 годзе, на 90-я ўгодкі абвяшчэньня незалежнасьці БНР. Але тады спроба зрабіць гэта аказалася няўдалай: Антаніну Піванос схапілі міліцыянты, габэлен адабралі, а саму актывістку судзілі нібыта за парушэньне закону «Аб масавых мерапрыемствах у Рэспубліцы Беларусь».

Пракуратура выявіла шэраг парушэньняў у працы дзіцячых садкоў Віцебскай вобласьці, паведаміла памочнік пракурора Віцебскай вобласьці па наглядзе за выкананьнем заканадаўства аб непаўналетніх і моладзі Ірына Крукоўская. Па выніках праведзенай праверкі пракурорамі гарадоў і раёнаў вобласьці было ўнесена 19 прадстаўленьняў, 5 прадпісаньняў, 1 пратэст. У дачыненьні да васьмі службовых асобаў накіраваны патрабаваньні аб узбуджэньні адміністрацыйных працэсаў.